ಕಾರ್ತಿಕ್ ಆರ್ಯನ್ ಅವರು ಇದೇ ಮೊದಲ ಬಾರಿಗೆ ಕರಣ್ ಜೋಹರ್ ನಿರ್ಮಾಣದ ಸಿನಿಮಾದಲ್ಲಿ ನಟಿಸಲಿದ್ದಾರೆ ಎಂದಾಗಲೇ ಕುತೂಹಲ ಹೆಚ್ಚಿತ್ತು. ಧರ್ಮ ಪ್ರೊಡಕ್ಷನ್ಸ್ ಸಂಸ್ಥೆ ಮೂಲಕ ಚಿತ್ರ ಹೊರ ಬರಲಿದೆ. ಈ ಸಿನಿಮಾಗೆ ‘ನಾಗ್ಜಿಲ್ಲಾ’ ಎನ್ನುವ ಟೈಟಲ್ ಇಡಲಾಗಿದೆ. ಸಾಮಾನ್ಯ ವ್ಯಕ್ತಿ ಹಾವಾಗಿ ಬದಲಾಗುವ ರೀತಿಯಲ್ಲಿ ಪೋಸ್ಟರ್ ಮೂಡಿ ಬಂದಿದೆ. ಆದರೆ, ಕಾರ್ತಿಕ್ ಆರ್ಯನ್ ಸಿನಿಮಾ ಪೋಸ್ಟರ್ ನೋಡಿದ ಬಳಿಕ ಒಂದು ದೊಡ್ಡ ತಪ್ಪು ಕಾಣಿಸಿದೆ. ಇದನ್ನು ಅಭಿಮಾನಿಗಳು ಕಂಡು ಹಿಡಿದಿದ್ದಾರೆ.
ಸಾಮಾನ್ಯವಾಗಿ ಹೊಸ ಸಿನಿಮಾ ಘೋಷಣೆ ಮಾಡುವಾಗ ಪೋಸ್ಟರ್ಗಾಗಿ ಫೋಟೋಶೂಟ್ ಮಾಡಿಸಲಾಗುತ್ತದೆ. ಇದಕ್ಕಾಗಿ ಸ್ವಲ್ಪ ಹಣ ಖರ್ಚಾಗುತ್ತದೆ. ಆದರೆ, ತಂಡದವರು ಇದನ್ನು ಉಳಿಸೋ ಪ್ಲ್ಯಾನ್ ಮಾಡಿದಂತಿದೆ. ಈ ಪೋಸ್ಟರ್ ಹಿಂದಿನ ಅಸಲಿ ಮರ್ಮವನ್ನು ನೆಟ್ಟಿಗರು ಬಿಚ್ಚಿಟ್ಟಿದ್ದಾರೆ. ಇದರಿಂದ ಧರ್ಮ ಸಂಸ್ಥೆಗೆ ಮುಜುಗರ ಆಗಿದೆ.
ಕಾರ್ತಿಕ್ ಆರ್ಯನ್ ಅವರ ‘ನಾಗ್ಜಿಲ್ಲಾ’ ಸಿನಿಮಾ ಪೋಸ್ಟರ್ ನೋಡಿದವರಿಗೆ ಅವರು ಈ ಮೊದಲು ಇನ್ಸ್ಟಾಗ್ರಾಮ್ನಲ್ಲಿ ಪೋಸ್ಟ್ ಮಾಡಿದ್ದ ಫೋಟೋ ನೆನಪಾಗಿದೆ. ಅವರು ಈ ಮೊದಲು ಮಾಡಿದ್ದ ಫೋಟೋ ಹಾಗೂ ಪೋಸ್ಟರ್ ಮಧ್ಯೆ ಸಾಕಷ್ಟು ಸಾಮ್ಯತೆ ಇದೆ. ಹೇರ್ಸ್ಟೈಲ್ನಿಂದ ಹಿಡಿದು ಎಲ್ಲವೂ ಬಹುತೇಕ ಹೋಲಿಕೆ ಇದೆ. ಎರಡೂ ಕಡೆಗಳಲ್ಲಿ ಕಾರ್ತಿಕ್ ಶರ್ಟ್ ಧರಿಸಿಲ್ಲ. ಹೀಗಾಗಿ, ಪೋಸ್ಟರ್ ಮಾಡಲು ಫೋಟೋಶೂಟ್ ಮಾಡೋದು ಬಿಟ್ಟು ಅವರದ್ದೇ ಖಾತೆಯ ಹಳೆಯ ಫೋಟೋಗಳನ್ನು ತೆಗದರೇ ಎನ್ನುವ ಪ್ರಶ್ನೆ ಮೂಡಿದೆ.
