ಲಖನೌ:
ಉತ್ತರ ಪ್ರದೇಶದಲ್ಲಿ “ಐ ಲವ್ ಮುಹಮ್ಮದ್” ವಿವಾದದ ನಡುವೆ, ಲಕ್ನೌದ ಕೆಲವು ಭಾಗಗಳಲ್ಲಿ “ಐ ಲವ್ ಶ್ರೀ ಯೋಗಿ ಆದಿತ್ಯನಾಥ್ ಜೀ” ಮತ್ತು “ಐ ಲವ್ ಬುಲ್ಡೋಜರ್” ಎಂಬ ಪೋಸ್ಟರ್‌ಗಳು ಕಾಣಿಸಿಕೊಂಡಿವೆ. ಇವುಗಳನ್ನು ಉತ್ತರ ಪ್ರದೇಶ ಬಿಜೆಪಿ ಯುವ ಮೋರ್ಚಾದ ಲಕ್ನೌ ಕಾರ್ಯದರ್ಶಿ ಅಮಿತ್ ತ್ರಿಪಾಠಿ ಅಳವಡಿಸಿದ್ದಾರೆ ಎಂದು ವರದಿಯಾಗಿದೆ. ಈ ಘಟನೆ ರಾಜ್ಯದಲ್ಲಿ ಉದ್ವಿಗ್ನ ವಾತಾವರಣವನ್ನು ಮತ್ತಷ್ಟು ತೀವ್ರಗೊಳಿಸಿದೆ.
ಕಾನ್ಪುರ, ವಾರಾಣಸಿ, ಬರೇಲಿ ಮತ್ತು ಮೊರಾದಾಬಾದ್‌ನಲ್ಲಿ ಇತ್ತೀಚಿನ ಹಿಂಸಾತ್ಮಕ ಘಟನೆಗಳ ಬಳಿಕ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ದುಷ್ಕರ್ಮಿಗಳ ವಿರುದ್ಧ ಕಠಿಣ ಕ್ರಮಕ್ಕೆ ಆದೇಶಿಸಿದ್ದಾರೆ. ವಿಡಿಯೋ ದೃಶ್ಯಾವಳಿಗಳು ಮತ್ತು ಸಾಮಾಜಿಕ ಜಾಲತಾಣದ ಮೂಲಕ ದುಷ್ಕರ್ಮಿಗಳನ್ನು ಗುರುತಿಸಿ ಎಫ್‌ಐಆರ್ ದಾಖಲಿಸಿ, ಅವರ ಆಸ್ತಿಗಳ ತನಿಖೆಗೆ ಸೂಚನೆ ನೀಡಿದ್ದಾರೆ. ಜೊತೆಗೆ, ಕಸಾಯಿಖಾನೆಗಳ ಆಕಸ್ಮಿಕ ತಪಾಸಣೆಗೆ ಆದೇಶಿಸಿದ್ದಾರೆ. ದಸರಾ ದುಷ್ಟತನ ಮತ್ತು ಭಯೋತ್ಪಾದನೆಯ ದಹನವನ್ನು ಸಂಕೇತಿಸುತ್ತದೆ ಎಂದು ಹೇಳಿದ ಮುಖ್ಯಮಂತ್ರಿ, ದುಷ್ಕರ್ಮಿಗಳ ವಿರುದ್ಧ ಕ್ರಮ ಕೈಗೊಳ್ಳಲು ಇದು ಸರಿಯಾದ ಸಮಯ ಎಂದು ಹೇಳಿದರು.
ಶುಕ್ರವಾರ, “ಐ ಲವ್ ಮುಹಮ್ಮದ್” ಕಾರ್ಯಕ್ರಮಕ್ಕೆ ಸಂಬಂಧಿಸಿದ ಪ್ರತಿಭಟನೆಯನ್ನು ಮುಂದೂಡಿದ ಘೋಷಣೆಯಿಂದ ಬರೇಲಿಯ ಮಸೀದಿಯ ಹೊರಗೆ ಗುಂಪು ಸೇರಿಕೊಂಡಿತು. ಇತೇಹದ್-ಎ-ಮಿಲ್ಲತ್ ಕೌನ್ಸಿಲ್‌ನ ಮುಖ್ಯಸ್ಥ ತೌಕೀರ್ ರಜಾ ಖಾನ್‌ ಅವರ ನಿವಾಸದ ಬಳಿ ಮತ್ತು ಕೋತ್ವಾಲಿ ಪ್ರದೇಶದ ಮಸೀದಿಯಲ್ಲಿ ಜನರು ಆಕ್ರೋಶ ವ್ಯಕ್ತಪಡಿಸಿದರು. ಪೊಲೀಸರೊಂದಿಗೆ ಘರ್ಷಣೆಯಾದಾಗ 24ಕ್ಕೂ ಹೆಚ್ಚು ಜನರನ್ನು ವಶಕ್ಕೆ ತೆಗೆದುಕೊಳ್ಳಲಾಯಿತು. ಜಿಲ್ಲಾಧಿಕಾರಿ ಅವಿನಾಶ್ ಸಿಂಗ್, ಪ್ರತಿಭಟನೆಗೆ ಲಿಖಿತ ಅನುಮತಿ ಬೇಕಿತ್ತು, ಆದರೆ ಕೆಲವರು ಶಾಂತಿಗೆ ಭಂಗ ತಂದರು ಎಂದು ಹೇಳಿದ್ದಾರೆ.
ಅಧಿಕಾರಿಗಳು, ಈ ಗಲಭೆಗಳು ಪಶ್ಚಿಮ ಉತ್ತರ ಪ್ರದೇಶದಲ್ಲಿ ಉದ್ಯಮ ಮತ್ತು ಪ್ರಗತಿಯ ವಿರುದ್ಧ ಷಡ್ಯಂತ್ರವಾಗಿದೆ ಎಂದು ಆರೋಪಿಸಿದ್ದಾರೆ. ನೊಯ್ಡಾದ ಅಂತಾರಾಷ್ಟ್ರೀಯ ವ್ಯಾಪಾರ ಮೇಳವನ್ನು ಕೆಡಿಸಲು ಮತ್ತು ರಾಜ್ಯವನ್ನು ಅಸುರಕ್ಷಿತವೆಂದು ಚಿತ್ರಿಸಲು ಯತ್ನ ನಡೆದಿದೆ” ಎಂದು ವರದಿಯಾಗಿದೆ. ಇದು ಯೋಗಿ ಸರ್ಕಾರದ ಹೈಟೆಕ್ ಉದ್ಯಮ ನಗರಿಗಳ ಯೋಜನೆಗೆ ಅಡ್ಡಿಯಾಗಬಹುದು ಎಂದು ಅವರು ಎಚ್ಚರಿಸಿದ್ದಾರೆ.
“ಐ ಲವ್ ಯೋಗಿ” ಪೋಸ್ಟರ್‌ಗಳು ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಕಾರಣವಾಗಿವೆ. ಕೆಲವರು ಇದು ಧ್ರುವೀಕರಣವನ್ನು ಉತ್ತೇಜಿಸುತ್ತದೆ ಎಂದಿದ್ದರೆ, ಬಿಜೆಪಿ ಬೆಂಬಲಿಗರು ಯೋಗಿಜಿಯ ಕಾನೂನು ಸುವ್ಯವಸ್ಥೆಗೆ ಬೆಂಬಲ ಎಂದಿದ್ದಾರೆ. ಈ ವಿವಾದ ರಾಜ್ಯದಲ್ಲಿ ಶಾಂತಿ ಕಾಪಾಡುವ ಸವಾಲನ್ನು ಎತ್ತಿಹಿಡಿದಿದೆ.
