ಶ್ರೀನಗರ:
ವೀಸಾ ನಿಯಮಗಳನ್ನು ಉಲ್ಲಂಘಿಸಿ ಲಡಾಖ್ ಮತ್ತು ಕಾಶ್ಮೀರದ ಕಾರ್ಯತಂತ್ರದ ಮತ್ತು ಸೂಕ್ಷ್ಮ ಪ್ರದೇಶಗಳಿಗೆ ಅನುಮತಿಯಿಲ್ಲದೆ ಭೇಟಿ ನೀಡಿದ್ದಕ್ಕಾಗಿ ಚೀನಾ ಮೂಲದ ವ್ಯಕ್ತಿಯನ್ನು ಜಮ್ಮು-ಕಾಶ್ಮೀರದ ಶ್ರೀನಗರದಲ್ಲಿ ಬಂಧಿಸಲಾಗಿದೆ. ಆತನಿಂದ ಮೊಬೈಲ್ ಫೋನ್ ಅನ್ನು ವಶಕ್ಕೆ ಪಡೆಯಲಾಗಿದ್ದು, ಅದನ್ನು ವಿಧಿವಿಜ್ಞಾನ ವಿಶ್ಲೇಷಣೆಗೆ ಕಳುಹಿಸಲಾಗಿದೆ. ಸೂಕ್ಷ್ಮ ಮಾಹಿತಿಯನ್ನು ಸೋರಿಕೆ ಮಾಡಿದ್ದಾನೆಯೇ ಎಂಬುದಾಗಿ ತನಿಖೆ ನಡೆಸಲಾಗುತ್ತಿದೆ.
ಬಂಧಿತ ಚೀನಾ ವ್ಯಕ್ತಿಯನ್ನು ಹು ಕಾಂಗ್ಟೈ ಎಂದು ಗುರುತಿಸಲಾಗಿದೆ. ಪ್ರವಾಸಿ ವೀಸಾದ ಮೇಲೆ ನವೆಂಬರ್ 19 ರಂದು ದೆಹಲಿಗೆ ಆಗಮಿಸಿದ ಹು ಕಾಂಗ್ಟೈ, ವಿದೇಶಿಯರ ಪ್ರಾದೇಶಿಕ ನೋಂದಣಿ ಕಚೇರಿಯಲ್ಲಿ (FRRO) ನೋಂದಾಯಿಸದೆ ಲೇಹ್, ಝನ್ಸ್ಕಾರ್ ಮತ್ತು ಕಾಶ್ಮೀರ ಕಣಿವೆಯ ವಿವಿಧ ಸ್ಥಳಗಳು ಸೇರಿದಂತೆ ನಿರ್ಬಂಧಿತ ಪ್ರದೇಶಗಳಿಗೆ ಭೇಟಿ ನೀಡಿದ್ದಾನೆ ಎಂದು ಆರೋಪಿಸಲಾಗಿದೆ.
29 ವರ್ಷದ ಹು ಕಾಂಗ್ಟೈ, ವಾರಣಾಸಿ, ಆಗ್ರಾ, ನವದೆಹಲಿ, ಜೈಪುರ, ಸಾರನಾಥ, ಗಯಾ ಮತ್ತು ಕುಶಿನಗರದಂತಹ ಆಯ್ದ ಬೌದ್ಧ ಧಾರ್ಮಿಕ ತಾಣಗಳಿಗೆ ಮಾತ್ರ ಭೇಟಿ ನೀಡಲು ವೀಸಾ ಅನುಮತಿಸಿದ್ದರೂ, ಝನ್ಸ್ಕರ್ನಲ್ಲಿ ಮೂರು ದಿನಗಳ ಕಾಲ ಉಳಿದು, ಮಠಗಳು ಮತ್ತು ಕಾರ್ಯತಂತ್ರದ ಪ್ರಾಮುಖ್ಯತೆಯ ಸ್ಥಳಗಳಿಗೆ ಭೇಟಿ ನೀಡಿದ್ದಾನೆ.
ಹವರ್ವಾನ್ನಲ್ಲಿರುವ ಬೌದ್ಧ ಮಠ ಮತ್ತು ದಕ್ಷಿಣ ಕಾಶ್ಮೀರದ ಅವಂತಿಪೋರಾದಲ್ಲಿರುವ ಬೌದ್ಧ ಅವಶೇಷಗಳು ಸೇರಿದಂತೆ ವಿವಿಧ ಸೂಕ್ಷ್ಮ ಸ್ಥಳಗಳಿಗೆ ಭೇಟಿ ನೀಡಿದ್ದಾನೆ. ಇದು ಸೇನೆಯ ವಿಕ್ಟರ್ ಫೋರ್ಸ್ ಪ್ರಧಾನ ಕಚೇರಿ, ಹಜರತ್ಬಾಲ್ ದೇವಾಲಯ, ಶಂಕರಾಚಾರ್ಯ ಬೆಟ್ಟ, ದಾಲ್ ಸರೋವರ ಮತ್ತು ಮೊಘಲ್ ಉದ್ಯಾನಕ್ಕೆ ಹತ್ತಿರದಲ್ಲಿದೆ.
ಭಾರತಕ್ಕೆ ಆಗಮಿಸಿದ ನಂತರ, ಭಾರತೀಯ ಸಿಮ್ ಕಾರ್ಡ್ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾನೆ. ಇದು ಆತನ ಚಟುವಟಿಕೆಗಳ ಬಗ್ಗೆ ಮತ್ತಷ್ಟು ಅನುಮಾನಗಳನ್ನು ಹುಟ್ಟುಹಾಕಿದೆ. ಆತನ ಬ್ರೌಸಿಂಗ್ ಇತಿಹಾಸವು CRPF ನಿಯೋಜನೆ, 370 ನೇ ವಿಧಿ ರದ್ದತಿ ಇತ್ಯಾದಿಗಳಿಗೆ ಸಂಬಂಧಿಸಿದ ಹುಡುಕಾಟಗಳನ್ನು ತೋರಿಸಿದೆ. ಆತ ಬ್ರೌಸಿಂಗ್ ಹಿಸ್ಟ್ರಿಯನ್ನು ಅಳಿಸಿದ್ದಾನೆಯೇ ಎಂಬುದನ್ನು ಭದ್ರತಾ ಸಂಸ್ಥೆಗಳು ತನಿಖೆ ಮಾಡುತ್ತಿವೆ.
ವಿಚಾರಣೆಯ ಸಮಯದಲ್ಲಿ ಹು ಕಾಂಗ್ಟೈ, ವೀಸಾ ನಿಯಮ ಉಲ್ಲಂಘನೆಗಳ ಬಗ್ಗೆ ತಿಳಿದಿಲ್ಲ ಎಂದು ನಟಿಸಿದ್ದಾನೆ. ಆದರೆ, ಅಧಿಕಾರಿಗಳು ಅವನ ಅನುಮಾನಾಸ್ಪದ ಚಲನವಲನಗಳ ಹಿಂದಿನ ಸತ್ಯವನ್ನು ಬಯಲು ಮಾಡಲು ಮುಂದಾಗಿದ್ದಾರೆ. ತಾನು ಬೋಸ್ಟನ್ ವಿಶ್ವವಿದ್ಯಾಲಯದಲ್ಲಿ ಭೌತಶಾಸ್ತ್ರವನ್ನು ಅಧ್ಯಯನ ಮಾಡಿದ್ದೇನೆ ಮತ್ತು ಕಳೆದ ಒಂಬತ್ತು ವರ್ಷಗಳಿಂದ ಅಮೆರಿಕದಲ್ಲಿ ವಾಸಿಸುತ್ತಿದ್ದೇನೆ ಎಂದು ತನಿಖಾಧಿಕಾರಿಗಳಿಗೆ ತಿಳಿಸಿದ್ದಾನೆ. ತಾನು ಪ್ರಯಾಣ ಉತ್ಸಾಹಿ ಎಂದು ಹೇಳಿಕೊಂಡಿದ್ದು, ಅವನ ಪಾಸ್ಪೋರ್ಟ್ ಅಮೆರಿಕ, ನ್ಯೂಜಿಲೆಂಡ್, ಬ್ರೆಜಿಲ್, ಫಿಜಿ ಮತ್ತು ಹಾಂಗ್ಕಾಂಗ್ನಂತಹ ಸ್ಥಳಗಳಿಗೆ ಭೇಟಿ ನೀಡಿರುವುದನ್ನು ತೋರಿಸಿದೆ.
ಶ್ರೀನಗರ ವಿಮಾನ ನಿಲ್ದಾಣದ ಬಳಿಯ ಬುಡ್ಗಾಮ್ ಜಿಲ್ಲೆಯ ಹುಮ್ಹಾಮಾ ಪೊಲೀಸ್ ಠಾಣೆಗೆ ವಿಚಾರಣೆಗಾಗಿ ಹು ಕಾಂಗ್ಟೈನನ್ನು ಕರೆದೊಯ್ಯಲಾಯಿತು. ಭಾರತದಲ್ಲಿನ ಆತನ ಚಟುವಟಿಕೆಗಳ ಬಗ್ಗೆ ಆತನನ್ನು ತೀವ್ರ ವಿಚಾರಣೆಗೆ ಒಳಪಡಿಸಲಾಗಿದೆ.
