ಚೆನ್ನೈ:
ರೋಲ್ಸ್ ರಾಯ್ಸ್ ಕಾರು ಖರೀದಿಸಲು ಹೆಚ್ಚಿನ ಮೂತ್ರಪಿಂಡಗಳು ಬೇಕಾಗುತ್ತವೆ ಎಂದು ಡಿಎಂಕೆ ಮಣಚನಲ್ಲೂರು ಶಾಸಕ ಕಥಿರವನ್ ತಮಾಷೆಯಾಗಿ ಹೇಳಿರುವ ವಿಡಿಯೊವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಇದು ಈಗ ವಿಪಕ್ಷಗಳ ಟೀಕೆಗೆ ಗುರಿಯಾಗಿವೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಬಿಜೆಪಿ ನಾಯಕ ಅಣ್ಣಾಮಲೈ ಮತ್ತು ಎಐಎಡಿಎಂಕೆ ಮುಖ್ಯಸ್ಥ ಎಡಪಾಡಿ ಕೆ. ಪಳನಿಸಾಮಿ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಇದು ಕಿಡ್ನಿ ಕಳ್ಳತನ ಜಾಲದ ಸುಳಿವು ನೀಡಿದೆ ಎಂದು ಆರೋಪಿಸಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿರುವ ಡಿಎಂಕೆ ಮಣಚನಲ್ಲೂರು ಶಾಸಕ ಕಥಿರವನ್ ವೈದ್ಯರ ಶುಲ್ಕ ಮತ್ತು ವೈದ್ಯಕೀಯ ವೆಚ್ಚಗಳ ಅನಂತರ ನನಗೆ 2ರಿಂದ 3 ಲಕ್ಷ ರೂ. ಸಿಗಬಹುದು. ನನ್ನ ತಂದೆಯ ರೋಲ್ಸ್ ರಾಯ್ಸ್ ಕಾರಿನ ಬೆಲೆ ಎಷ್ಟು ಗೊತ್ತಾ? ಅದು 14.5 ಕೋಟಿ ರೂ. ನಾನು ಮಾಡಿರುವ ಒಟ್ಟು ಆಪರೇಷನ್ 252. 2 ಲಕ್ಷ ರೂ. ಲಾಭದೊಂದಿಗೆ ನಾನು ರೋಲ್ಸ್ ರಾಯ್ಸ್ ಅನ್ನು ಯಾವಾಗ ಖರೀದಿಸುತ್ತೇನೆ? ತಿರುಪತ್ತೂರಿನ ಜನರಿಂದ ಎಲ್ಲ ಮೂತ್ರಪಿಂಡಗಳನ್ನು ತೆಗೆದಿದ್ದರೆ ಮಾತ್ರ ನಾನು ಅದನ್ನು ಖರೀದಿಸಬಹುದಿತ್ತು. ನನ್ನ ಏಕೈಕ ಚಿಂತೆ ಎಂದರೆ 252 ಜೀವಗಳನ್ನು ಉಳಿಸಿದ ನನ್ನ ಬಗ್ಗೆ ಯಾರೂ ಮಾತನಾಡಲಿಲ್ಲ. ಯಾರೂ ಅದರ ಬಗ್ಗೆ ಮಾತನಾಡುತ್ತಿಲ್ಲ ಎಂದು ಹೇಳಿದ್ದಾರೆ.
ಇದಕ್ಕೆ ಪ್ರತಿಕ್ರಿಯಿಸಿದ ಅಣ್ಣಾಮಲೈ, ಇದು ತಮಾಷೆಯಲ್ಲ. ನಾಮಕ್ಕಲ್‌ನ ಬಡ ನೇಕಾರರಿಗೆ ಆಮಿಷವೊಡ್ಡಿ ಅವರ ಮೂತ್ರಪಿಂಡಗಳನ್ನು ಕದ್ದಿದ್ದಾರೆ. ಶಾಸಕರೇ ತಮ್ಮ ಆಸ್ಪತ್ರೆಯು ಈ ವ್ಯಾಪಾರದಿಂದ ಕನಿಷ್ಠ 7.5 ಕೋಟಿ ರೂ. ಗಳಿಸಿದೆ ಎಂದು ಒಪ್ಪಿಕೊಂಡಿದ್ದಾರೆ. ಆದರೂ ಡಿಎಂಕೆ ಸರ್ಕಾರ ಯಾವುದೇ ನಿರ್ದಿಷ್ಟ ಕ್ರಮ ಕೈಗೊಂಡಿಲ್ಲ. ಈ ಮೂತ್ರಪಿಂಡ ಕಳ್ಳತನ ದಂಧೆಯಲ್ಲಿ ಮಧ್ಯವರ್ತಿಯಾಗಿರುವ ಅವರ ಕಾರ್ಯನಿರ್ವಾಹಕ ದ್ರಾವಿಡ ಆನಂದನ್ ಅವರನ್ನು ಬಂಧಿಸಲಾಗಿದೆಯೇ? ಎಂದು ಪ್ರಶ್ನಿಸಿದ್ದಾರೆ.
ಎಡಪ್ಪಾಡಿ ಕೆ. ಪಳನಿಸಾಮಿ ಮಾತನಾಡಿ, ಡಿಎಂಕೆ ಸದಸ್ಯರು ನಡೆಸುವ ಕ್ಲಿನಿಕ್‌ಗಳಿಗೆ ಭೇಟಿ ನೀಡದಂತೆ ಸಾರ್ವಜನಿಕರಿಗೆ ಸಲಹೆ ನೀಡಿದರು.ತಪ್ಪಾಗಿಯು ಡಿಎಂಕೆ ಕಾರ್ಯಕರ್ತರು ನಡೆಸುವ ಕ್ಲಿನಿಕ್‌ಗಳಿಗೆ ಭೇಟಿ ನೀಡಬೇಡಿ. ನೀವು ನಿಮ್ಮ ಮೂತ್ರಪಿಂಡವನ್ನು ಕಳೆದುಕೊಳ್ಳಬಹುದು. ಬಡವರಿಗೆ ಹಣ ತೋರಿಸಿ ಅಂಗಾಂಗಗಳನ್ನು ಕದಿಯುವ ಗುಂಪು ಇಲ್ಲಿದೆ. ಡಿಎಂಕೆ ಸರ್ಕಾರವೇ ಒಂದು ಸಮಿತಿಯನ್ನು ರಚಿಸಿತು.
ಅದು ಡಿಎಂಕೆ ಶಾಸಕರಿಗೆ ಸೇರಿದ ಆಸ್ಪತ್ರೆಯಲ್ಲಿ ಮೂತ್ರಪಿಂಡ ಕಳ್ಳತನವನ್ನು ಪತ್ತೆ ಮಾಡಿದೆ. ಈ ಬಗ್ಗೆ ಕ್ರಮ ಕೈಗೊಳ್ಳಲಾಗಿದೆಯೇ? ಇಲ್ಲ ಎಂದು ಅವರು ಹೇಳಿದರು. ಆಸ್ಪತ್ರೆಯಲ್ಲಿ ಅಂಗಾಂಗ ಕಸಿಗೆ ಪರವಾನಗಿಯನ್ನು ಮಾತ್ರ ರದ್ದುಗೊಳಿಸಲಾಗಿದೆ. ಯಾವುದೇ ಬಂಧನಗಳನ್ನು ಮಾಡಲಾಗಿಲ್ಲ ಎಂದು ದೂರಿದರು.
ರೋಲ್ಸ್ ರಾಯ್ಸ್ ಕಾರು ಖರೀದಿಸಲು ಅವರು ಜನರ ಮೂತ್ರಪಿಂಡಗಳನ್ನು ತೆಗೆದುಹಾಕಬೇಕಾಗಬಹುದು ಎಂದು ಶಾಸಕರು ಹೇಳುತ್ತಾರೆ. ಅವರ ಕಾರು 12 ಕೋಟಿ ರೂ. ಮೌಲ್ಯದ್ದಾಗಿದೆ. ಕಾರು ಖರೀದಿಸಲು ಎಷ್ಟು ಮೂತ್ರಪಿಂಡಗಳನ್ನು ಕದಿಯಬೇಕು ಎಂದು ಅವರೇ ಹೇಳಿದ್ದಾರೆ ಎಂದರು.
