ನವದೆಹಲಿ :
ಜನರನ್ನು ಆಕರ್ಷಿಸಲು ದೊಡ್ಡ ಬಜೆಟ್ನಲ್ಲಿ ಜಾಹೀರಾತುಗಳನ್ನು ಮಾಡಲಾಗುತ್ತಿದೆ. ಜನರನ್ನು ಆಕರ್ಷಿಸಲು ಏನೆಲ್ಲ ಬೇಕೋ ಅದೆಲ್ಲವನ್ನೂ ಮಾಡಲಾಗುತ್ತಿದೆ. ಇತ್ತೀಚೆಗೆ ಡ್ರೀಮ್ 11 ಜಾಹೀರಾತೊಂದು ಪ್ರಸಾರ ಕಂಡಿದೆ. ಇದರಲ್ಲಿ ದೊಡ್ಡ ದೊಡ್ಡ ಸೆಲೆಬ್ರಿಟಿಗಳು ಭಾಗಿ ಆಗಿದ್ದಾರೆ. ಈ ಜಾಹೀರಾತಿಗೆ ಖರ್ಚಾದ ಹಣದಲ್ಲಿ ಒಂದು ದೊಡ್ಡ ಬಜೆಟ್ನ ಸಿನಿಮಾನೇ ಮಾಡಬಹುದು ಎಂಬ ಮಾತುಗಳು ಕೇಳಿ ಬಂದಿವೆ. ಈ ಬಗ್ಗೆ ಭರ್ಜರಿ ಚರ್ಚೆ ನಡೆಯುತ್ತಿದೆ. ಹಾಗಾದರೆ ಈ ಜಾಹೀರಾತಿಗೆ ಖರ್ಚಾದ ಹಣ ಎಷ್ಟು? ಆ ಬಗ್ಗೆ ಇಲ್ಲಿದೆ ವಿವರ.
‘ಡ್ರೀಮ್ 11’ ಜಾಹೀರಾತಿನಲ್ಲಿ ನಟರಾದ ಆಮಿರ್ ಖಾನ್, ರಣಬೀರ್ ಕಪೂರ್, ಕ್ರಿಕೆಟರ್ಗಳಾದ ರೋಹಿತ್ ಶರ್ಮಾ, ಜಸ್ಪ್ರೀತ್ ಬೂಮ್ರಾ, ಹಾರ್ದಿಕ್ ಪಾಂಡ್ಯ, ರಿಷಭ್ ಪಂತ್ ಮೊದಲಾದವರು ಇದ್ದರು. ಇನ್ನು, ಇದರ ಪ್ರಮೋಷನ್ಗೆ ಆಲಿಯಾ ಭಟ್ ಹಾಗೂ ಮೊದಲಾದವರನ್ನು ಬಳಕೆ ಮಾಡಿಕೊಳ್ಳಲಾಗಿದೆ. ಈ ಜಾಹೀರಾತು ನಿರ್ಮಾಣಕ್ಕೆ ಖರ್ಚಾದ ಮೊತ್ತಕ್ಕೆ ಎಲ್ಲರೂ ಶಾಕ್ ಆಗಿದ್ದಾರೆ.
ಆಮಿರ್ ಖಾನ್ ಅವರು ಪ್ರತಿ ಜಾಹೀರಾತಿಗೆ 10-12 ಕೋಟಿ ರೂಪಾಯಿ ಪಡೆದುಕೊಳ್ಳುತ್ತಾರೆ. ರೋಹಿತ್ ಶರ್ಮಾ ಅವರು 3.5 ಕೋಟಿ ರೂಪಾಯಿ ಪಡೆದುಕೊಳ್ಳುತ್ತಾರೆ. ರಿಷಭ್ ಪಂತ್ 1-2 ಕೋಟಿ ರೂಪಾಯಿ, ರಣಬೀರ್ ಕಪೂರ್ 6 ಕೋಟಿ ರೂಪಾಯಿ, ಹಾರ್ದಿಕ್ ಪಾಂಡ್ಯ 2-3 ಕೋಟಿ ರೂಪಾಯಿ. ಅರ್ಬಾಜ್ ಖಾನ್ 35 ಲಕ್ಷ ರೂಪಾಯಿ, ಅಶ್ವಿನ್ 1 ಕೋಟಿ ರೂಪಾಯಿ, ಬೂಮ್ರಾ 2-3 ಕೋಟಿ ರೂಪಾಯಿ, ಜಾಕಿ ಶ್ರಾಫ್ 50 ಲಕ್ಷ ರೂಪಾಯಿ ಪಡೆದುಕೊಳ್ಳುತ್ತಾರೆ. ಈ ಎಲ್ಲರೂ ಈ ಜಾಹೀರತಿನಲ್ಲಿ ಇದ್ದಾರೆ. ಇವರ ಸಂಭಾವನೆ ಸೇರಿದರೆ 25-35 ಕೋಟಿ ರೂಪಾಯಿ ಆಗುತ್ತದೆ. ಇಷ್ಟಕ್ಕೆ ನಿಂತಿಲ್ಲ.
ಈ ಜಾಹೀರಾತಿನ ಪ್ರೊಡಕ್ಷನ್ಗೂ ಹಣ ಬೇಕಾಗುತ್ತದೆ. ನಿರ್ದೇಶಕರಿಗೆ, ಸೆಟ್ ನಿರ್ಮಾಣಕ್ಕೆ ಹಣ ಪಾವತಿ ಮಾಡಬೇಕಾಗುತ್ತದೆ. ಈ ಜಾಹೀರಾತಿನ ಪ್ರಮೋಷನ್ಗೆ ಆಲಿಯಾ ಭಟ್ ಅವರನ್ನು ಬಳಕೆ ಮಾಡಿಕೊಳ್ಳಲಾಗಿತ್ತು. ಅವರು ಕೂಡ ಸಂಭಾವನೆ ಪಡೆದಿದ್ದಾರೆ. ಇದು ಸೇರಿದರೆ 40-50 ಕೋಟಿ ರೂಪಾಯಿವರೆಗೆ ಜಾಹೀರಾತು ನಿರ್ಮಾಣಕ್ಕೆ ಖರ್ಚಾಗಿದೆ ಎಂದು ವರದಿ ಆಗಿದೆ.
ಇಷ್ಟು ದೊಡ್ಡ ಮೊತ್ತದಲ್ಲಿ ಒಂದು ದೊಡ್ಡ ಬಜೆಟ್ ಸಿನಿಮಾ ನಿರ್ಮಾಣ ಮಾಡಬಹುದು ಎಂಬುದು ಕೆಲವರ ಅಭಿಪ್ರಾಯ. ಇನ್ನೂ ಕೆಲವು ವರದಿಗಳ ಪ್ರಕಾರ ಈ ಜಾಹೀರಾತಿನಲ್ಲಿ ಭಾಗಿ ಆದ ಎಲ್ಲಾ ಸೆಲೆಬ್ರಿಟಿಗಳು ವರ್ಷದ ಕಾಂಟ್ರ್ಯಾಕ್ಟ್ನಲ್ಲಿ ಇರುವವರು. ಹೀಗಾಗಿ, ಆ ಲೆಕ್ಕದಲ್ಲಿ ಹಣ ಪಾವತಿ ಮಾಡಲಾಗಿದ್ದು, ಇಷ್ಟು ದೊಡ್ಡ ಮೊತ್ತ ಖರ್ಚಾಗಿಲ್ಲ ಎಂದು ಕೂಡ ಹೇಳಲಾಗುತ್ತಿದೆ.
