ನವದೆಹಲಿ:
‘ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರು ಆಯುಧಪೂಜೆ ದಿನವಾದ ಮಂಗಳವಾರ ಪ್ಯಾರಿಸ್ನಲ್ಲಿ ರಫೇಲ್ ಯುದ್ಧ ವಿಮಾನಕ್ಕೆ ಪೂಜೆ ನೆರವೇರಿಸಲಿದ್ದಾರೆ.
ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಮೂರು ದಿನಗಳ ಫ್ರಾನ್ಸ್ ಪ್ರವಾಸ ಕೈಗೊಂಡಿದ್ದು, ಈ ಮೂಲಕ ಅವರು ಪ್ರತೀ ವರ್ಷ ಆಚರಣೆ ಮಾಡುತ್ತಿದ್ದಂತೆ ಈ ಬಾರಿ ಫ್ರಾನ್ಸ್ನಿಂದಲೇ ಆಯುಧ ಪೂಜೆ ಪೂರೈಸಲಿದ್ದಾರೆ.
‘ಹಲವು ವರ್ಷಗಳಿಂದ ರಾಜನಾಥ್ ಅವರು ದಸರಾ ವೇಳೆ ಆಯುಧ ಪೂಜೆ ಮಾಡುವ ರೂಢಿ ಇರಿಸಿಕೊಂಡಿದ್ದಾರೆ. ಹಿಂದಿನ ಎನ್ಡಿಎ ಸರ್ಕಾರದ ಅವಧಿಯಲ್ಲಿ ಗೃಹಸಚಿವರಾಗಿದ್ದ ವೇಳೆಯೂ ಪೂಜೆ ನೆರವೇರಿಸಿದ್ದರು’ ಎಂದು ಹಿರಿಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
‘ವಿಮಾನ ಹಸ್ತಾಂತರವಾದ ಬಳಿಕ, ರಫೇಲ್ ಯುದ್ಧವಿಮಾನ ಹಾರಾಟದ ಮೊದಲ ಅನುಭವ ಗಳಿಸಲು ರಾಜನಾಥ್ ಸಿಂಗ್ ಅವರು ಪ್ಯಾರಿಸ್ನ ವಾಯುನೆಲೆಯಿಂದ ಪ್ರಯಾಣ ಬೆಳೆಸಲಿದ್ದಾರೆ.
ಭಾರತ ಒಟ್ಟು 36 ರಫೇಲ್ ಯುದ್ಧ ವಿಮಾನಗಳನ್ನು ಖರೀದಿಸಿದ್ದು, ಇವುಗಳಲ್ಲಿ ಒಂದನ್ನು ಮಾತ್ರ ಫ್ರಾನ್ಸ್ ಇಂದು(ಮಂಗಳವಾರ) ಹಸ್ತಾಂತರಿಸಲಿದೆ. ಆದರೆ ಮೊದಲ ಹಂತದಲ್ಲಿ ನೀಡಲಾಗುವ ನಾಲ್ಕು ವಿಮಾನಗಳು ಮೇ ತಿಂಗಳಲ್ಲಿ ಭಾರತಕ್ಕೆ ಬರಲಿವೆ.
ಪ್ರಜಾಪ್ರಗತಿಯಿಂದ ತಾಜಾ ಸುದ್ದಿಗಾಗಿ ಪ್ರಜಾಪ್ರಗತಿ facebook page ಲೈಕ್ ಮಾಡಿ
