ಬೆಂಗಳೂರು
ಮತ ಮಹತ್ವ ಸಾರುವ ಹತ್ತಾರು ಸಂದೇಶಗಳು..ಮತದಾನ ಮಾಡಲು ಮರೆಯದಿರಿ ಎಂದು ಸಾರಿ ಸಾರಿ ಹೇಳುವ ರೇಖೆಗಳು, ಯಾವ ಆಮಿಷಕ್ಕೂ ಬಲಿಯಾಗದೇ ನಿಮ್ಮ ಆಯ್ಕೆ ಮಾಡಿ ಎಂದು ಕರೆ ನೀಡಿದ .ಯಕ್ಷಗಾನ ವೇಷಧಾರಿಗಳು, ಡೊಳ್ಳು ಕುಣಿತ, ಗಾಂಧಿ ತಾತ …ಇದು ಬೆಂಗಳೂರಿನ ಸಸ್ಯೋದ್ಯಾನ ಲಾಲ್‍ಭಾಗ್‍ನಲ್ಲಿ ಭಾನುವಾರ ಬೆಳಗ್ಗೆ ಕಂಡು ಬಂದ ಚಿತ್ರಣ.
ಮತದಾನದ ಜಾಗೃತಿ ಅಭಿಯಾನದ ಅಂಗವಾಗಿ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ಲಾಲ್‍ಬಾಗ್ ಗಾಜಿನ ಮನೆ ಆವರಣದಲ್ಲಿ ಆಯೋಜಿಸಿದ್ದ ರೇಖೆಗಳಲ್ಲಿ ಚುನಾವಣೆ ಮತ್ತು ಮತದಾನ ಜಾಗೃತಿ ಅಭಿಯಾನದಲ್ಲಿ ನಾಡಿನ ಖ್ಯಾತ ಕಲಾವಿದರು ಪಾಲ್ಗೊಂಡು ಮತದಾನದ ಜಾಗೃತಿ ಕುರಿತಾದ ಚಿತ್ರಗಳನ್ನು ಬರೆದರು. ಲಾಲ್‍ಬಾಗ್‍ಗೆ ಭೇಟಿ ನೀಡುವ ಸಾವಿರಾರು ಜನರು,ಪ್ರವಾಸಿಗರು ಜತೆಗೆ ವಿದೇಶಿ ಪ್ರವಾಸಿಗರು ಕೂಡ ಭಾರತದ ಪ್ರಜಾಪ್ರಭುತ್ವದ ಮಹಾ ಉತ್ಸವದಲ್ಲಿ ಪಾಲ್ಗೊಳ್ಳುವ ಮಹತ್ವವನ್ನು ಅರಿತುಕೊಂಡು ತಾವೂ ತಪ್ಪದೇ ಮತದಾನ ಮಾಡುವ ಸಂಕಲ್ಪ ಮಾಡಿದರು.
ಅಭಿಯಾನ ಉದ್ಘಾಟಿಸಿ ಮಾತನಾಡಿದ ರಾಜ್ಯ ಮುಖ್ಯ ಚುನಾವಣಾಧಿಕಾರಿ ಸಂಜೀವಕುಮಾರ್ ಮತದಾನದ ಮಹತ್ವ ಸಾರುವಲ್ಲಿ ಕಲಾವಿದರು ಪಾಲ್ಗೊಂಡು ಜಾಗೃತಿ ಮೂಡಿಸುತ್ತಿರುವ ಕುರಿತು ಮೆಚ್ಚುಗೆ ವ್ಯಕ್ತಮಾಡಿದರು. ಮತದಾನದ ಕರ್ತವ್ಯಪ್ರಜ್ನೆಯನ್ನು ಮತದಾರರು ಅದರಲ್ಲೂ ಬೆಂಗಳೂರಿನಂತಹ ನಗರದ ಮತದಾರರು ಮೆರೆಯಬೇಕಿದೆ. ಉಳಿದ ಪ್ರದೇಶಗಳಿಗೆ ಹೋಲಿಕೆ ಮಾಡಿದರೆ ಬೆಂಗಳೂರು ನಗರದಲ್ಲಿ ಶೇ.10ರಷ್ಟು ಮತದಾನ ಕಡಿಮೆ ಪ್ರಮಾಣದಲ್ಲಾಗುತ್ತಿರುವುದು ಯೋಚಿಸಬೇಕಾದ ವಿಚಾರವಾಗಿದೆ. ಮತದಾನದಲ್ಲಿ ತಪ್ಪದೇ ಪಾಲ್ಗೊಳ್ಳುವ ನಿಟ್ಟಿನಲ್ಲಿ ನಗರದ ಮತದಾರರಿಗೆ ಸಂದೇಶ ನೀಡುವ ಅದರಲ್ಲೂ ನೈತಿಕ ಮತದಾನದ ಕುರಿತು ಜಾಗೃತಿ ಮೂಡಿಸಲು ಅನೇಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗುತ್ತಿದೆ.
ಪ್ರಜ್ಞಾವಂತ ಮತದಾರರು ಯಾವುದೇ ಆಸೆ ಆಮಿಷಗಳಿಗೊಳಗಾಗದೇ ಮತ ಚಲಾವಣೆ ಮಾಡುವ ಮೂಲಕ ಉತ್ತಮ ಪ್ರತಿನಿಧಿಗಳನ್ನು ಆಯ್ಕೆ ಮಾಡಬೇಕಿದೆ. ಮತದಾನಕ್ಕಾಗಿ ಸಾಕಷ್ಟು ಸೌಕರ್ಯಗಳನ್ನು ಕಲ್ಪಿಸಲಾಗುತ್ತಿದ್ದು ಈ ಬಾರಿ ದಿವ್ಯಾಂಗರನ್ನು ಮನೆ ಬಾಗಿಲಿನಿಂದಲೇ ಮತಗಟ್ಟೆಗೆ ಕರೆದುಕೊಂಡು ಹೋಗಿ ಮತಚಲಾವಣೆ ಬಳಿಕ ವಾಪಸ್ ಮನೆಗೆ ಬಿಡುವ ವ್ಯವಸ್ಥೆ ಕಲ್ಪಿಸಲಾಗಿದೆ. ಮತದಾರರು ಈ ಸೌಲಭ್ಯಗಳನ್ನು ಬಳಸಿಕೊಂಡು ಹೆಚ್ಚು ಸಂಖ್ಯೆಯಲ್ಲಿ ಮತದಾನ ಮಾಡುವ ಮೂಲಕ ನಗರದ ಜನರು ಮತಗಟ್ಟೆಗಳಿಂದ ದೂರ ಉಳಿಯುವುದಿಲ್ಲವೆಂದು ಈ ಚುನಾವಣೆಯಲ್ಲಿ ತೋರಿಸಬೇಕಿದೆ ಎಂದರು.
ಚುನಾವಣಾ ಅಕ್ರಮಗಳ ಕುರಿತು ಜನರಲ್ಲಿ ಜಾಗೃತಿ ಅವಶ್ಯವಿದ್ದು ರಾಜ್ಯದಲ್ಲಿ ಸಿ ವಿಜಿಲ್ ಆ್ಯಪ್ ಮೊದಲಾದ ವಿಧಾನಗಳ ಮೂಲಕ ದೂರುಗಳನ್ನು ಸಲ್ಲಿಸಬಹುದಾಗಿದೆ. ದೂರು ಸ್ವೀಕರಿಸಿದ 100 ನಿಮಿಷಗಳೊಳಗಾಗಿ ಈ ಕುರಿತು ಸೂಕ್ತ ಕ್ರಮವಹಿಸಿ ಚುನಾವಣಾ ಆಯೋಗಕ್ಕೆ ವರದಿ ಸಲ್ಲಿಸುವ ಕ್ಷಿಪ್ರ ವ್ಯವಸ್ಥೆ ಜಾರಿಯಲ್ಲಿದ್ದು ಮತದಾರರು ಚುನಾವಣೆ ನೈತಿಕವಾಗಿ ನಡೆಯುವ ನಿಟ್ಟಿನಲ್ಲೂ ಸಕ್ರಿಯವಾಗಿ ಪಾಲ್ಗೊಳ್ಳಬೇಕಿದೆ ಎಂದು ಹೇಳಿದರು.
ನಿವೃತ್ತ ನ್ಯಾಯಮೂರ್ತಿ ಡಿ.ವಿ.ಶೈಲೇಂದ್ರ ಕುಮಾರ್ ಜಾಗೃತಿ ಅಭಿಯಾನದ ಕುರಿತು ಮೆಚ್ಚುಗೆ ವ್ಯಕ್ತಪಡಿಸಿದರಲ್ಲದೇ ಕಲಾವಿದರು, ವೀಕ್ಷಕರೊಂದಿಗೆ ಬಹು ಹೊತ್ತಿನ ಕಾಲ ಬೆರೆತು ಮತದಾನದಲ್ಲಿ ಎಲ್ಲರೂ ಸಕ್ರಿಯವಾಗಿ ಪಾಲ್ಗೊಳ್ಳುವ ಕುರಿತು ಮೂಡಿಸುವ ಜಾಗೃತಿ ಅಭಿಯಾನಕ್ಕೆ ಯಶಸ್ಸು ಹಾರೈಸಿದರು. ಮತದಾನ ಯಾಕೆ ಮಾಡಬೇಕೆಂಬ ಕುರಿತು ನಗರದ ನಾಗರಿಕರಿಗೆ ಮನ ಮುಟ್ಟಿಸುವ ಸಂದೇಶಗಳನ್ನು ಹೊತ್ತ ಇಂತಹ ಚಿತ್ರಗಳು ಜನರ ಮನಸ್ಸಿನಲ್ಲಿ ಸದಾ ಉಳಿಯುತ್ತದೆ ಎಂದರು.
ತೋಟಗಾರಿಕಾ ಇಲಾಖೆ ನಿರ್ದೇಶಕ ಮತ್ತು ಚುನಾವಣಾ ಮಾಧ್ಯಮ ಸಮನ್ವಯಾಧಿಕಾರಿ ಡಾ.ಎಂ.ವೆಂಕಟೇಶ್ ಮಾತನಾಡಿ ಸಾವಿರ ಶಬ್ದಗಳಲ್ಲಿ ಹೇಳಬಲ್ಲದನ್ನು ಒಂದು ಚಿತ್ರ ಹೇಳಬಲ್ಲದು. ಕಲಾವಿದರ ಚಿತ್ರಗಳು ನೂರಾರು ಸಂದೇಶಗಳನ್ನು ಬಿತ್ತರಿಸುತ್ತಿವೆ. ಹನಿ ಹನಿಗೂಡಿದರೆ ಹಳ್ಳ ತೆನೆ ತೆನೆಗೂಡಿದರೆ ಬಳ್ಳ ಎಂಬಂತೆ ಪ್ರತಿಯೊಂದು ಮತವೂ ಮುಖ್ಯವಾಗುತ್ತದೆ. ಜನರು ಮತದನದ ಮಹತ್ವವನ್ನು ಅರಿತುಕೊಂಡು ಮತಚಲಾಯಿಸಿದಾಗ ಪ್ರಜಾಪ್ರಭುತ್ವ ಯಶಸ್ವಿಯಾಗುತ್ತದೆ.
ಮತದಾನದ ದಿನದಂದು ನೀಡುವ ಸಾರ್ವತ್ರಿಕ ರಜೆಯನ್ನು ವ್ಯರ್ಥ ಮಾಡದೇ ಮತದಾನದ ಹಕ್ಕು ಚಲಾಯಿಸುವ ಜವಾಬ್ಧಾರಿ ಮೆರೆಯುವ ಮೂಲಕ ಪ್ರಜಾಪ್ರಭುತ್ವ ಯಶಸ್ವಿಗೊಳಿಸಬೇಕಿದೆ ಎಂದರು.
ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ಅಧಿಕಾರಿ ಭೃಂಗೇಶ್ ರೇಖೆಗಳಲ್ಲಿ ಚುನಾವಣೆ -2019 ಹಾಗೂ ಮತದಾನದ ಜಾಗೃತಿ ಅಭಿಯಾನದ ಮಹತ್ವದ ಕುರಿತು ತಿಳಿಸಿದರು. ಈ ಚುನಾವಣೆಯಲ್ಲಿ ಬೆಂಗಳೂರಿಗರು ಹೆಚ್ಚು ಹೆಚ್ಚು ಸಂಖ್ಯೆಯಲ್ಲಿ ಮತಚಲಾವಣೆ ಮಾಡುವ ಮತ್ತು ನೈತಿಕ ಮತದಾನದ ಕುರಿತು ಜಾಗೃತಿ ಮೂಡಿಸುವ ನಿಟ್ಟಿನಲ್ಲಿ ಇಂತಹ ಅನೇಕ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತಿದೆ ಎಂದು ಹೇಳಿದರು.
ಬೆಂಗಳೂರು ದಕ್ಷಿಣ ಕ್ಷೇತ್ರದ ಚುನಾವಣಾಧಿಕಾರಿ ನಕುಲ್ ಮತ್ತಿತರರು ಪಾಲ್ಗೊಂಡಿದ್ದರು. ಕಲಾವಿದ ಗುಜ್ಜಾರಪ್ಪ ಬಿ.ಜಿ. ಸ್ಥಳದಲ್ಲೇ ರಾಜ್ಯ ಮುಖ್ಯ ಚುನಾವಣಾಧಿಕಾರಿ ಸಂಜೀವಕುಮಾರ್ ಮತ್ತು ನಿವೃತ್ತ ನ್ಯಾಯಮೂರ್ತಿ ಡಿ.ವಿ.ಶೈಲೇಂದ್ರ ಕುಮಾರ್ ರೇಖಾ ಚಿತ್ರ ರಚಿಸಿದರು. ಕಲಾವಿದರಾದ ಚಂದ್ರ ಗಂಗೊಳ್ಳಿ, ನಂಜುಂಡಸ್ವಾಮಿ ವೈ.ಎಸ್, ಬಾಬು ಜತ್ಕರ್, ವಿ.ಆರ್.ಸಿ.ಶೇಖರ್, ನಾಗನಾಥ ಜಿ.ಎಸ್,ವಿ.ಗೋಪಾಲ್, ಯತಿ ಸಿದ್ಧಕಟ್ಟೆ, ಭಾವೂರಾಯ ಬಿ.ಪತ್ತಾರೆ,ಸುಬ್ರಮಣ್ಯ ಮೇಗರವಳ್ಳಿ,ಎಂ.ವಿ.ಶಿವರಾಂ,ಗುರುದತ್ತ ಎನ್.ಎಸ್,ರಘುಪತಿ ಶೃಂಗೇರಿ ಮೊದಲಾದವರು ಚಿತ್ರ ರಚಿಸಿದರು.
ಪ್ರಜಾಪ್ರಗತಿಯಿಂದ ತಾಜಾ ಸುದ್ದಿಗಾಗಿ ಪ್ರಜಾಪ್ರಗತಿ facebook pageಲೈಕ್ ಮಾಡಿ
