ನವದೆಹಲಿ: 
ರಾಜಧಾನಿ ದೆಹಲಿ ಸೇರಿದಂತೆ ನೆರೆಹೊರೆಯ ಜಿಲ್ಲೆಗಳಾದ ಗಜಿಯಾಬಾದ್, ನೊಯ್ಡಾಗಳಲ್ಲಿ ಬೆಳಗ್ಗೆಯಿಂದ ಭಾರೀ ಮಳೆಯಾಗುತ್ತಿದ್ದು ತಾಪಮಾನ ಇಳಿಕೆಯಾಗಿದೆ. ದೆಹಲಿ ಮತ್ತು ಗುರುಗ್ರಾಮ್ ನ ಕೆಲವು ಭಾಗಗಳಲ್ಲಿ ಪ್ರವಾಹ ಉಂಟಾಗಿ ಭಾರೀ ಸಂಚಾರ ದಟ್ಟಣೆಯುಂಟಾಗಿದೆ ಎಂದು ವರದಿಗಳು ತಿಳಿಸಿವೆ.
ದೆಹಲಿಯ ಪ್ರಮುಖ ರಸ್ತೆಗಳು ನೀರಿನಿಂದ ಆವೃತವಾಗಿ ಸಂಚಾರ ಸಂಪರ್ಕ ಕಷ್ಟವಾಗಿದೆ. ದೆಹಲಿ ಪೊಲೀಸರು ಜನತೆಗೆ ಮುನ್ನೆಚ್ಚರಿಕೆ ಘೋಷಿಸಿದ್ದಾರೆ.ತೀವ್ರ ಮಳೆಗೆ ಒಂದು ಕಡೆ ಮನೆ ಕುಸಿದು ಬಿದ್ದಿದೆ. ಭಾರತೀಯ ಹವಾಮಾನ ಇಲಾಖೆಯ ಪ್ರಕಾರ ಅರೇಬಿಯನ್ ಸಮುದ್ರದಿಂದ ನೈರುತ್ಯ ಗಾಳಿ ಮತ್ತು ಬಂಗಾಳಕೊಲ್ಲಿಯಿಂದ ವಾಯವ್ಯ ಮಾರುತ ತೀವ್ರವಾಗಿ ಬೀಸುತ್ತಿದ್ದು ಇಂದು ಮತ್ತು ನಾಳೆ ಭಾರೀ ಮಳೆಯಾಗುವ ಸಾಧ್ಯತೆಯಿದೆ.
ದೆಹಲಿಯ ಸಫ್ದರ್ಜಂಗ್ ನಿಗಾ ಘಟಕದಲ್ಲಿ ಇಂದು 139.2 ಮಿಲಿ ಮೀಟರ್ ಮಳೆಯಾಗಿದ್ದು ಆಗಸ್ಟ್ ನಲ್ಲಿ ಇಲ್ಲಿ ಸರಾಸರಿ 151.1 ಮಿಲಿ ಮೀಟರ್ ಮಳೆಯಾಗುತ್ತದೆ.
