ಪಾಕಿಸ್ತಾನ :
ಏಷ್ಯಾ ಕಪ್ ಪಂದ್ಯಾವಳಿಯ ಸೂಪರ್ 4 ಪಂದ್ಯದಲ್ಲಿ ಭಾರತ ತಂಡವು ಶ್ರೀಲಂಕಾ ತಂಡವನ್ನು 41 ರನ್‌ಗಳಿಂದ ಸೋಲಿಸುವ ಮೂಲಕ ಫೈನಲ್‌ನಲ್ಲಿ ಸ್ಥಾನವನ್ನು ಭದ್ರಪಡಿಸಕೊಂಡಿತು.ಆದರೆ ಆತಿಥೇಯ ಶ್ರೀಲಂಕಾ ತಂಡವು ಮೊದಲ ಇನ್ನಿಂಗ್ಸ್ ಆಡಿದ ವಿಧಾನವನ್ನು ಪರಿಗಣಿಸಿ ಸುಲಭವಾಗಿ ಗೆಲುವು ಸಾಧಿಸಬಹುದು ಎಂದು ತೋರುತ್ತಿತ್ತು.
ಶ್ರೀಲಂಕಾದ ಸ್ಪಿನ್ನರ್ ದುನಿತ್ ವೆಲ್ಲಾಲಗೆ ಭಾರತದ ಅಗ್ರ ಕ್ರಮಾಂಕದ 5 ವಿಕೆಟ್ ಕಬಳಿಸಿದರು .ಅಂತಿಮವಾಗಿ ಭಾರತ ತಂಡ 213 ರನ್‌ಗಳಿಗೆ ಸರ್ವಪತನವಾಗುತ್ತಿದ್ದಂತೆಯೇ, ಅನೇಕ ಅಭಿಮಾನಿಗಳು ಪಾಕಿಸ್ತಾನ ಕ್ರಿಕೆಟ್ ತಂಡದ ಮಾಜಿ ವೇಗಿ ಶೋಯೆಬ್ ಅಖ್ತರ್‌ಗೆ ಭಾರತವು ‘ಪಂದ್ಯವನ್ನು ಫಿಕ್ಸ್ ಮಾಡಿಕೊಂಡಿದೆ’ ಮತ್ತು ಉದ್ದೇಶಪೂರ್ವಕವಾಗಿ ಪಂದ್ಯವನ್ನು ಸೋಲಲು ಪ್ರಯತ್ನಿಸುತ್ತಿದೆ ಎಂದು ಸಂದೇಶ ಕಳುಹಿಸಿದರು.
“ನೀವು ಏನು ಮಾಡುತ್ತಿದ್ದೀರಿ ಎಂದು ನಮಗೆ ಗೊತ್ತಿಲ್ಲ. ಪಾಕಿಸ್ತಾನ ತಂಡವನ್ನು ಹೊರಹಾಕಲು ಭಾರತ ಉದ್ದೇಶಪೂರ್ವಕವಾಗಿ ಸೋಲುತ್ತಿದ್ದಾರೆ ಎಂದು ‘ಭಾರತವು ಪಂದ್ಯವನ್ನು ಫಿಕ್ಸ್ ಮಾಡಿದೆ’ ಎಂದು ನನಗೆ ಮೀಮ್‌ಗಳು ಮತ್ತು ಸಂದೇಶಗಳು ಬಂದವು,” ಎಂದು ಶೋಯೆಬ್ ಅಖ್ತರ್ ತಿಳಿಸಿದರು.
“ಭಾರತ ಮತ್ತು ಇತರ ದೇಶಗಳಿಂದ ನನಗೆ ಫೋನ್‌ಕಾಲ್‌ಗಳು ಬರುತ್ತಿವೆ, ಭಾರತವು ಉದ್ದೇಶಪೂರ್ವಕವಾಗಿ ಸೋಲುತ್ತಿದೆ ಎಂದು ಹೇಳುತ್ತಿದ್ದರು,” ಎಂದು ಶೋಯೆಬ್ ಅಖ್ತರ್ ತಮ್ಮ ಯೂಟ್ಯೂಬ್ ಚಾನೆಲ್‌ನ ವಿಡಿಯೋದಲ್ಲಿ ಶ್ರೀಲಂಕಾ ಪಂದ್ಯದಲ್ಲಿ ತೋರಿಸಿದ ಹೋರಾಟವನ್ನು ಶ್ಲಾಘಿಸುವಾಗ ಅಭಿಮಾನಿಗಳನ್ನು ಕುಟುಕಿದ್ದಾರೆ.
ಆದಾಗ್ಯೂ, ಈ ರೀತಿ ಸಂದೇಶ ಕಳುಹಿಸಿದ ಅಭಿಮಾನಿಗಳಿಗೆ ಶೋಯೆಬ್ ಅಖ್ತರ್ ತಿರುಗೇಟು ನೀಡಿದ್ದು, ಅಸಂಬದ್ಧ ಮಾತುಗಳೆಂದು ಕರೆದರು. ಒಂದು ಗೆಲುವು ಫೈನಲ್‌ ತಲುಪುವುದನ್ನು ಖಚಿತಪಡಿಸುವ ಪಂದ್ಯವನ್ನು ಭಾರತ ಏಕೆ ಸೋಲುತ್ತದೆ? ಎಂದು ಶೋಯೆಬ್ ಅಖ್ತರ್ ಅಭಿಮಾನಿಗಳನ್ನು ಪ್ರಶ್ನಿಸಿದರು.
ಭಾರತದ ಲೆಗ್ ಸ್ಪಿನ್ನರ್ ಕುಲದೀಪ್ ಯಾದವ್ ಅವರನ್ನು ವಿಶೇಷವಾಗಿ ಹೊಗಳಿದ ರಾವಲ್ಪಿಂಡಿ ಎಕ್ಸ್‌ಪ್ರೆಸ್ ಶೋಯೆಬ್ ಅಖ್ತರ್, ತಮ್ಮ ತಂಡದ ಪರವಾಗಿ ಪಂದ್ಯವನ್ನು ತಿರುಗಿಸಲು 4 ವಿಕೆಟ್ ಪಡೆದರು ಎಂದು ಹೇಳಿದರು.
“ಭಾರತ ಏಕೆ ಸೋಲುತ್ತದೆ ಹೇಳಿ? ಅವರು ಫೈನಲ್‌ಗೆ ಹೋಗಲು ಬಯಸುತ್ತಾರೆ. ನೀವು ಯಾವುದೇ ಕಾರಣವಿಲ್ಲದೆ ಮೇಮ್‌ಗಳನ್ನು ಮಾಡುತ್ತೀರಿ. ಇದು ಭಾರತದಿಂದ ಉತ್ತಮ ಹೋರಾಟವಾಗಿದೆ,” ಎಂದು ಪಾಕಿಸ್ತಾನ ಮಾಜಿ ವೇಗಿ ತಿಳಿಸಿದರು.
“ಕುಲದೀಪ್ ಯಾದವ್ ಬೌಲಿಂಗ್ ಮಾಡಿದ ರೀತಿ ದೊಡ್ಡದಾಗಿದೆ. ಜಸ್ಪ್ರೀತ್ ಬುಮ್ರಾ ಅವರನ್ನು ನೋಡಿ, ಸಣ್ಣ ಮೊತ್ತವನ್ನು ರಕ್ಷಿಸುವಾಗ ಹೋರಾಟವನ್ನು ನೋಡಿ,” ಎಂದು ಹೇಳುವ ಮೂಲಕ ಭಾರತ ಪಂದ್ಯವನ್ನು ಫಿಕ್ಸ್ ಮಾಡಿದೆ ಎಂದು ಆರೋಪ ಮಾಡುವವರ ವಿರುದ್ಧ ಶೋಯೆಬ್ ಅಖ್ತರ್ ಕಿಡಿಕಾರಿದರು.
ಇದೇ ವೇಳೆ ಬಾಬರ್ ಅಜಂ ನಾಯಕತ್ವದ ಪಾಕಿಸ್ತಾನ ತಂಡವು ಭಾರತ ವಿರುದ್ಧದ ಕೊನೆಯ ಪಂದ್ಯದಲ್ಲಿ ತೋರಿದ ‘ಹೋರಾಟದ ಕೊರತೆ’ಯನ್ನು ಟೀಕಿಸಿದರು. ಪಾಕಿಸ್ತಾನದ ವೇಗಿಗಳಾದ ಹ್ಯಾರಿಸ್ ರೌಫ್, ನಸೀಮ್ ಶಾ ಮತ್ತು ಶಾಹೀನ್ ಅಫ್ರಿದಿ ಅವರ ಫಿಟ್‌ನೆಸ್ ಅನ್ನು ಸಹ ಪಾಕಿಸ್ತಾನ ಲೆಜೆಂಡ್ ಬೌಲರ್ ಶೋಯೆಬ್ ಅಖ್ತರ್ ಪ್ರಶ್ನಿಸಿದ್ದಾರೆ.
ಶ್ರೀಲಂಕಾ ವಿರುದ್ಧ ಗೆಲ್ಲುವ ಮೂಲಕ ಭಾರತ ತಂಡ ಈಗಾಗಲೇ ಫೈನಲ್‌ಗೆ ತಲುಪಿದ್ದು, ಪ್ರಶಸ್ತಿ ಗೆಲುವಿನ ಪಂದ್ಯದಲ್ಲಿ ಪಾಕಿಸ್ತಾನ ಎರಡನೇ ಸ್ಥಾನವನ್ನು ಖಚಿತಪಡಿಸಿಕೊಳ್ಳಲು ಗುರುವಾರ, ಸೆಪ್ಟೆಂಬರ್ 14ರಂದು ನಡೆಯುವ ತನ್ನ ಮುಂದಿನ ಪಂದ್ಯದಲ್ಲಿ ಶ್ರೀಲಂಕಾ ತಂಡವನ್ನು ಸೋಲಿಸಬೇಕಾಗಿದೆ.
ಪ್ರಜಾಪ್ರಗತಿಯಿಂದ ತಾಜಾ ಸುದ್ದಿಗಾಗಿ ಪ್ರಜಾಪ್ರಗತಿ facebook page ಲೈಕ್ ಮಾಡಿ
