ನವದೆಹಲಿ
ಕೆಂಪು ಕೋಟೆ ಪ್ರದೇಶದ ಕಾರ್ ಬಾಂಬ್ ಸ್ಫೋಟಕ್ಕೆ ಸಂಬಂಧಿಸಿದಂತೆ NIA ತನಿಖೆ ನಡೆಸಿದ್ದು, ಆತ್ಮಹತ್ಯಾ ಬಾಂಬರ್‌ ಡಾ. ಉಮರ್ ನಬಿಯ ಸಹಚರ ಡ್ಯಾನಿಶ್ ಅಲಿಯಾಸ್‌ ಜಾಸಿರ್ ಬಿಲಾಲ್ ವಾನಿಯ ಮೊದಲ ಚಿತ್ರ ಬಹಿರಂಗವಾಗಿದೆ. ಜಾಸಿರ್ ಭಯೋತ್ಪಾದಕ ಡಾ. ಉಮರ್ ಉನ್ನಬಿಯ ಆಪ್ತ ಸಹಾಯಕನಾಗಿದ್ದು, 13 ಜನರು ಸಾವನ್ನಪ್ಪಿ 32 ಜನರು ಗಾಯಗೊಂಡ ಸ್ಫೋಟದ ಸಂಚು ರೂಪಿಸಿದ ಆರೋಪ ಹೊತ್ತಿದ್ದಾನೆ. NIA ಅಧಿಕಾರಿಗಳ ಪ್ರಕಾರ, ಸಂಭಾವ್ಯ ದಾಳಿಗಳಿಗೆ ಡ್ರೋನ್‌ಗಳನ್ನು ಮಾರ್ಪಡಿಸುವುದು ಮತ್ತು ಸುಧಾರಿತ ರಾಕೆಟ್ ಕಾರ್ಯವಿಧಾನಗಳನ್ನು ಅಭಿವೃದ್ಧಿಪಡಿಸಲು ಪ್ರಯತ್ನಿಸುವುದು ಸೇರಿದಂತೆ ಮಾಡ್ಯೂಲ್‌ಗೆ ಜಾಸಿರ್ ನಿರ್ಣಾಯಕ ತಾಂತ್ರಿಕ ಬೆಂಬಲವನ್ನು ಒದಗಿಸಿದ್ದಾನೆ.
ಅನಂತ್‌ನಾಗ್ ಜಿಲ್ಲೆಯ ಖಾಜಿಗುಂಡ್ ನಿವಾಸಿಯಾಗಿರುವ ಜಾಸಿರ್ ವಾನಿ, ದೆಹಲಿಯ ದಾಳಿಯ ಹಿಂದಿನ ಸಕ್ರಿಯ ಸಹ-ಸಂಚುಗಾರನಾಗಿದ್ದ. ರಾಷ್ಟ್ರ ರಾಜಧಾನಿಯಲ್ಲಿ ಸ್ಫೋಟಕ್ಕೆ ಮುಂಚಿತವಾಗಿ ಡ್ರೋನ್‌ಗಳನ್ನು ಮಾರ್ಪಡಿಸಿ ರಾಕೆಟ್‌ಗಳನ್ನು ತಯಾರಿಸಲು ಪ್ರಯತ್ನಿಸಿದ್ದಾನೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಮಾರಕ ಕಾರ್ ಬಾಂಬ್ ಸ್ಫೋಟಕ್ಕೂ ಮುನ್ನ ಡ್ರೋನ್‌ಗಳನ್ನು ಮಾರ್ಪಡಿಸುವ ಮತ್ತು ರಾಕೆಟ್‌ಗಳನ್ನು ತಯಾರಿಸಲು ಪ್ರಯತ್ನಿಸುವ ಮೂಲಕ ಭಯೋತ್ಪಾದಕ ದಾಳಿಗಳನ್ನು ನಡೆಸಲು ಡ್ಯಾನಿಶ್ ತಾಂತ್ರಿಕ ಬೆಂಬಲವನ್ನು ನೀಡಿದ್ದಾನೆ ಎಂದು NIA ಹೇಳಿಕೆಯಲ್ಲಿ ತಿಳಿಸಿದೆ.
ಕ್ಯಾಮೆರಾಗಳ ಜೊತೆಗೆ ಭಾರವಾದ ಬಾಂಬ್‌ಗಳನ್ನು ಹೊತ್ತೊಯ್ಯಬಲ್ಲ ದೊಡ್ಡ ಬ್ಯಾಟರಿಗಳನ್ನು ಅಳವಡಿಸಲಾದ ಶಕ್ತಿಶಾಲಿ ಡ್ರೋನ್‌ಗಳನ್ನು ತಯಾರಿಸಲು ಡ್ಯಾನಿಶ್ ಪ್ರಯತ್ನಿಸಿದ್ದಾನೆ ಎಂದು ಮೂಲಗಳು ತಿಳಿಸಿವೆ. ಭಯೋತ್ಪಾದಕ ಘಟಕವು ಜನದಟ್ಟಣೆಯ ಪ್ರದೇಶದ ಮೇಲೆ ಶಸ್ತ್ರಾಸ್ತ್ರ ಸಜ್ಜಿತ ಡ್ರೋನ್ ದಾಳಿಗೆ ಯೋಚಿಸಿತ್ತು.
ಹರಿಯಾಣದಲ್ಲಿ ಸೆರೆ ಸಿಕ್ಕಿರುವ ‘ವೈಟ್ ಕಾಲರ್’ ಉಗ್ರರು, ಟೆಲಿಗ್ರಾಂ ಆ್ಯಪ್‌ನಲ್ಲಿ ಸಂವಹನಕ್ಕೆ ಬಳಸಿಕೊಂಡಿದ್ದ ಗೌಪ್ಯ (ಎನ್‌ಕ್ರಿಪ್ಟೆಡ್‌) ಚಾಟಿಂಗ್ ಸಂದೇಶಗಳನ್ನು ತನಿಖಾಧಿಕಾರಿಗಳು ಡಿಕೋಡ್ ಮಾಡಿದ್ದಾರೆ. ಮುಜಾಮಿಲ್, ಶಾಹೀನ್, ಉಮರ್ ನಬಿ, ಆದಿಲ್ ಹ್ಮದ್ ರಾಥರ್ ನಡುವೆ ಬಳಕೆಯಾಗಿದ್ದ ‘ಬಿರ್ಯಾನಿ’, ‘ದಾವತ್’, ‘ಮೆಡಿಸಿನ್’, ‘ಮೇಡಂ ಸರ್ಜನ್’, ‘ಮೇಡಂ ಎಕ್ಸ್’, ‘ಮೇಡಂ ಝಡ್’ ಎಂಬ ಕೋಡ್‌ವರ್ಡ್‌ಗಳನ್ನು ತನಿಖಾಧಿಕಾರಿಗಳು ಬೇಧಿಸಿದ್ದಾರೆ.
ದೆಹಲಿ ಸ್ಫೋಟ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಲ್-ಫಲಾಹ್ ವಿಶ್ವವಿದ್ಯಾಲಯದ ಕುಲಪತಿ ಜವಾದ್ ಅಹ್ಮದ್ ಸಿದ್ದಿಕಿ ಅವರ ಸಹೋದರ ಅಹ್ಮದ್ ಸಿದ್ದಿಕಿಯನ್ನು ಹೈದರಾಬಾದ್‌ನಲ್ಲಿ ಮಧ್ಯಪ್ರದೇಶ ಪೊಲೀಸರು ಬಂಧಿಸಿದ್ದಾರೆ. ಭಾನುವಾರ ಕಾಶ್ಮೀರದಲ್ಲಿ ಬಂಧಿಸಲಾಗಿದ್ದ ದೆಹಲಿ ಸ್ಫೋಟದ ಸಂಚುಕೋರ ಅಮಿರ್ ರಶೀದ್ ಅಲಿಯನ್ನು ಹೆಚ್ಚಿನ ವಿಚಾರಣೆಗಾಗಿ 10 ದಿನಗಳ ಎನ್‌ಐಎ ಕಸ್ಟಡಿಗೆ ನೀಡಲಾಗಿದೆ.
