ಹುಳಿಯಾರು:
ನಫೆಡ್ನಲ್ಲಿ ನೋಂದಣಿಯಾಗದೆ ರಾಗಿ ಖರೀದಿಗೆ ಹಿನ್ನೆಡೆ
ಸರ್ಕಾರದ ಬೆಂಬಲ ಬೆಲೆ ಯೋಜನೆಯಡಿ ರೈತರಿಂದ ರಾಗಿ ಖರೀದಿಸಲು ಸೋಮವಾರ ಹುಳಿಯಾರು ಕೃಷಿ ಉತ್ಪನ್ನ ಮಾರುಕಟ್ಟೆಯಲ್ಲಿ ನೋಂದಣಿ ಕಾರ್ಯ ಆರಂಭವಾಯಿತು. ಆದರೆ ದೊಡ್ಡ ಹಿಡುವಳಿದಾರರ ಐಡಿ ಲಾಕ್ ಆಗಿರುವ ಪರಿಣಾಮ ನೋಂದಾಯಿಸಲು ಪರದಾಡುವಂತಾಯಿತು.
ಮಾರುಕಟ್ಟೆಯಲ್ಲಿ ಕ್ವಿಂಟಲ್ ರಾಗಿಗೆ 1700 ರಿಂದ 1900 ರೂ. ಗಳು ಇದ್ದರಿಂದ ಸರ್ಕಾರ ನಫೆಡ್ ಕೇಂದ್ರ ತೆರೆಯುವುದನ್ನೆ ರೈತರು ಕಾದು ಕುಳಿತಿದ್ದರು.
ಕ್ವಿಂಟಲ್ ರಾಗಿಗೆ 3,377 ರೂ. ಬೆಂಬಲ ಬೆಲೆಯಲ್ಲಿ ನೋಂದಣಿ ಹಾಗೂ ಖರೀದಿಯನ್ನು ಏಕಕಾಲಕ್ಕೆ ಅಂದರೆ ಡಿ.28 ರಿಂದ ಆರಂಭಿಸುವುದಾಗಿ ಆಹಾರ ಇಲಾಖೆ ಪ್ರಕಟಣೆಯಲ್ಲಿ ತಿಳಿಸಿತ್ತಾದರೂ ಡಿ.28 ರಂದು ಖರೀದಿಸುವುದಿರಲಿ ನೋಂದಣಿ ಕಾರ್ಯವೇ ಆರಂಭವಾಗಿರಲಿಲ್ಲ.
ದೊಡ್ಡ ಹಿಡುವಳಿದರರಿಗೆ ಸಮಸ್ಯೆ :
ನಿತ್ಯ ರೈತರು ಎಪಿಎಂಸಿಗೆ ಅಲೆಯುವುದು ಸಾಮಾನ್ಯ ದೃಶ್ಯವಾಗಿತ್ತು. ಸೋಮವಾರ ನೋಂದಣಿ ಪ್ರಕ್ರಿಯೆ ಆರಂಭಿಸುವುದಾಗಿ ತಿಳಿಸಿದ್ದರಿಂದ ಮುಂಜಾನೆಯಿಂದಲೆ ಪಹಣಿ,
ಬ್ಯಾಂಕ್ ಪಾಸ್ಬುಕ್ ಜೆರಾಕ್ಸ್ ಹಾಗೂ ಫ್ರೂಟ್ಸ್ ಐಡಿ ಹಿಡಿದುಕೊಂದು ಸರತಿ ಸಾಲಿನಲ್ಲಿ ರೈತರು ನಿಂತರು. ಸಣ್ಣ ಮತ್ತು ಅತಿ ಸಣ್ಣ ಹಿಡುವಳಿದಾರರು ನೋಂದಣಿ ಮಾಡಿಸಿ ಹಿಂದಿರುಗಿದರೆ ದೊಡ್ಡಹಿಡುವಳಿದಾರ ನೋಂದಣಿಯಾಗದೆ ಪರದಾಡುತ್ತಿದ್ದರು.
ರೈತರ ಆಕ್ರೋಶ :
ನೋಂದಾಣಿಗಾಗಿ ಗಂಟೆಗಟ್ಟಲೆ ಸರತಿ ಸಾಲಿನಲ್ಲಿ ನಿಂತ ಕೊನೆಗೆ ನೋಂದಣಿ ಪ್ರಕ್ರಿಯೆ ಲಾಕ್ ಆಗಿದೆ. ನೋಂದಣಿ ಮಾಡಲಾಗುವುದಿಲ್ಲ ಎನ್ನುತ್ತಿದ್ದಂತೆ ಆಕ್ರೋಶಗೊಂಡ ರೈತರು ಖರೀದಿ ಅಧಿಕಾರಿಗಳ ಮೇಲೆ ಎರಗಲು ಮುಂದಾದರು.
ಈ ಹಿಂದಿನ ಎಲ್ಲಾ ರಾಗಿ ಖರೀದಿ ಸಂದರ್ಭದಲ್ಲೂ ದೊಡ್ಡ ಹಿಡುವಳಿದಾರರ ರಾಗಿ ಖರೀದಿಸಲಾಗಿತ್ತು. ಆದರೆ ಈಗ ಏಕಾಏಕಿ ಲಾಕ್ ಮಾಡಿರುವುದು ಸರಿಯಲ್ಲ. ಒಬ್ಬ ರೈತನಿಂದ ಗರಿಷ್ಟ 20 ಕ್ವಿಂಟಲ್ ರಾಗಿ ಖರೀದಿಸುವುದಾಗಿ ನಿಗದಿ ಮಾಡಿದ ಮೇಲೂ ಲಾಕ್ ಮಾಡಿರುವ ಉದ್ದೇಶವಾದರೂ ಏನು ಎಂದು ರೈತರು ಪ್ರಶ್ನಿಸಿದರು.
ಸರ್ಕಾರದ ಅವೈಜ್ಞಾನಿಕ ನೀತಿ :
ಸರ್ಕಾರ ರೈತರಲ್ಲಿ ತಾರತಮ್ಯ ಮಾಡುತ್ತಿದ್ದು, ಒಂದು ಕಣ್ಣಿಗೆ ಬೆಣ್ಣೆ ಮತ್ತೊಂದು ಕಣ್ಣಿಗೆ ಸುಣ್ಣ ಬಳಿಯುತ್ತಿದೆ. ಒಂದೇ ಪಹಣಿಯಲ್ಲಿ ಇಬ್ಬರು ರೈತರ 3-3 ಎಕರೆ ಜಮೀನು ಜಂಟಿಯಾಗಿರುತ್ತದೆ.
ಹೀಗೆ 4 ಎಕರೆ ಮೇಲಿದೆ ಎಂದು ಲಾಕ್ ಮಾಡಿದರೆ ಇಬ್ಬರು ರೈತರಿಗೂ ಅನ್ಯಾಯ ಮಾಡಿದಂತಾಗುತ್ತದೆ. ಸರ್ಕಾರದ ಬೆಂಬಲೆ ಬೆಲೆ ಎಲ್ಲಾ ರಾಗಿ ಬೆಳೆಗಾರರಿಗೂ ಸಿಗಬೇಕು. ಹಾಗಾಗಿ ತಕ್ಷಣ ದೊಡ್ಡ ಹಿಡುವಳಿದಾರರ ನೋಂದಣಿ ಅನ್ಲಾಕ್ ಮಾಡುವಂತೆ ಒತ್ತಾಯಿಸಿದರು.
ತಕ್ಷಣ ಖರೀದಿ ಅಧಿಕಾರಿ ಶಿವರಾಜ್ ಅವರು ಆಹಾರ ಇಲಾಖೆಯ ಜಂಟಿ ನಿರ್ದೇಶಕರಾದ ಎಂ.ಸಿ.ಶ್ರೀನಿವಾಸಯ್ಯ ಅವರಿಗೆ ದೂರವಾಣಿ ಕರೆ ಮಾಡಿ ವಿಷಯ ತಿಳಿಸಿದಾಗ, ಕೃಷಿ ಇಲಾಖೆಯವರೊಂದಿಗೆ ಮಾತನಾಡಿ ಸರಿಪಡಿಸುವ ಭರವಸೆ ಸಿಕ್ಕ ಮೇಲೆ ರೈತರು ಶಾಂತರಾದರು.
ಅಲ್ಲದೆ ಇನ್ನೆರಡು ದಿನಗಳಲ್ಲಿ ಸಮಸ್ಯೆ ಇತ್ಯಾರ್ಥವಾಗದಿದ್ದರೆ ಪ್ರತಿಭಟನೆಯ ಹಾದಿ ತುಳಿಯಬೇಕಾಗುತ್ತದೆ ಎಂದು ಎಚ್ಚರಿಸಿ ವಾಪಸ್ಸಾದರು.
ಒಂದು ಎಕರೆಗೆ 10 ಕ್ವಿಂಟಲ್ನಂತೆ ಗರಿಷ್ಟ 20 ಕ್ವಿಂಟಲ್ ರಾಗಿ ಖರೀದಿಸುವುದಾಗಿ ಸರ್ಕಾರ ತಿಳಿಸಿತ್ತು. ಅದರಂತೆ ದೊಡ್ಡ ಹಿಡುವಳಿದಾರರೂ ಸಹ 20 ಕ್ವಿಂಟಲ್ ರಾಗಿಯನ್ನಾದರೂ 3,377 ರೂಪಾಯಿಗೆ ಮಾರುವ ಆಸೆಯಿಂದ ನೋಂದಣಿಗಾಗಿ ಎಪಿಎಂಸಿಗೆ ಬಂದಿದ್ದರು.
ಆದರೆ ಫ್ರೂಟ್ಸ್ ಸಾಫ್ಟ್ವೇರ್ನಲ್ಲಿ 4 ಎಕರೆಗಿಂತ ಹೆಚ್ಚಾಗಿರುವ ಎಲ್ಲಾ ರೈತರ ನೋಂದಣಿ ಪ್ರಕ್ರಿಯೆ ಲಾಕ್ ಆಗಿದೆ. ಇದರಿಂದ ನೋಂದಣಿ ಮಾಡಿಸಲಾಗದೆ ದೊಡ್ಡ ಹಿಡುವಳಿದಾರರು ಆಕ್ರೋಶ ಹೊರ ಹಾಕಿದರು.
ಪ್ರಜಾಪ್ರಗತಿಯಿಂದ ತಾಜಾ ಸುದ್ದಿಗಾಗಿ ಪ್ರಜಾಪ್ರಗತಿ facebook page ಲೈಕ್ ಮಾಡಿ
