ನವದೆಹಲಿ:
ಇತ್ತೀಚಿನ ಇಂಡಿಯಾ ಸ್ಟೇಟ್ ಆಫ್ ಫಾರೆಸ್ಟ್ ರಿಪೋರ್ಟ್(ಐಎಸ್‌ಎಫ್‌ಆರ್) 2023ರ ಪ್ರಕಾರ, ಶೇ. 24.62 ರಷ್ಟಿದ್ದ ದೇಶದ ಒಟ್ಟು ಅರಣ್ಯ ಮತ್ತು ಮರಗಳ ವ್ಯಾಪ್ತಿಯು 2023 ರಲ್ಲಿ ಶೇ. 25.17ಕ್ಕೆ ಹೆಚ್ಚಾಗಿದೆ.ಏತನ್ಮಧ್ಯೆ, ಮೊದಲ ಬಾರಿ, ಕೃಷಿ ಅರಣ್ಯ ಅಡಿಯಲ್ಲಿ ಬೆಳೆದ ಮರಗಳನ್ನು ಸಹ ಅರಣ್ಯ ವ್ಯಾಪ್ತಿಗೆ ತರಲಾಗಿದೆ.
ISFR 2023 ವರದಿಯು ಅರಣ್ಯ ಪ್ರದೇಶವನ್ನು ದಾಖಲಿಸಿದೆ ಮತ್ತು ಮರಗಳ ವ್ಯಾಪ್ತಿಯು ಶೇ. 25.17ಕ್ಕೆ ಏರಿಕೆಯಾಗಿದೆ. ಒಟ್ಟು ಅರಣ್ಯ ಪ್ರದೇಶವು 7,15,342.61 ಚದರ ಕಿ.ಮೀ ಆಗಿದ್ದು, ಇದು ದೇಶದ ಭೌಗೋಳಿಕ ಪ್ರದೇಶದ ಶೇ. 21.76 ರಷ್ಟು ಇದ್ದು, ದೇಶದ ಭೌಗೋಳಿಕ ಪ್ರದೇಶದ ಶೇ. 3.41 ರಷ್ಟು ಮರಗಳಿವೆ. ಇವೆರಡು ಸೇರಿ ಒಟ್ಟು ಅರಣ್ಯ ಮತ್ತು ಮರಗಳ ವ್ಯಾಪ್ತಿಯು 8,27,356.95 ಚ.ಕಿ.ಮೀ. ಇದೆ.
ಕುರುಚಲು ಪ್ರದೇಶವು 43,622 ಚದರ ಕಿಮೀ (1.33%) ಮತ್ತು ಅರಣ್ಯೇತರ ಪ್ರದೇಶವು 24,16,489 ಚದರ ಕಿಮೀ (73.50%) ಆವರಿಸಿದೆ.
ಛತ್ತೀಸ್‌ಗಢ, ಉತ್ತರ ಪ್ರದೇಶ ಒಡಿಶಾ, ರಾಜಸ್ಥಾನ ಮತ್ತು ಜಾರ್ಖಂಡ್ ಅರಣ್ಯ ಮತ್ತು ಮರಗಳ ವ್ಯಾಪ್ತಿ ಹೆಚ್ಚಾಗಿದೆ. ಆದರೆ ಮಧ್ಯ ಪ್ರದೇಶ, ಕರ್ನಾಟಕ, ನಾಗಾಲ್ಯಾಂಡ್, ಬಿಹಾರ ಮತ್ತು ತ್ರಿಪುರದಲ್ಲಿ ಅರಣ್ಯ ಮತ್ತು ಮರಗಳ ವ್ಯಾಪ್ತಿಯು ಕಡಿಮೆಯಾಗಿದೆ ಎಂದು ವರದಿ ತಿಳಿಸಿದೆ.
ಭಾರತದ ಅರಣ್ಯ ಸಮೀಕ್ಷೆಯ ಇತ್ತೀಚಿನ 18ನೇ ದ್ವೈವಾರ್ಷಿಕ ಮೌಲ್ಯಮಾಪನ ISFR ಸಮೀಕ್ಷೆಯು ಒಂದು ವರ್ಷಕ್ಕೂ ಹೆಚ್ಚು ವಿಳಂಬವಾಗಿದೆ. ಕಳೆದ ವರ್ಷವೇ ಈ ವರದಿ ಬಿಡುಗಡೆಯಾಗಬೇಕಿತ್ತು. ಈ ವರದಿಯು ಹೆಚ್ಚುತ್ತಿರುವ ದಾಸ್ತಾನು, ಅರಣ್ಯದ ಹೊರಗಿನ ಮರಗಳ ವ್ಯಾಪ್ತಿ, ಮ್ಯಾಂಗ್ರೋವ್ ಹೊದಿಕೆ, ಬಿದಿರು ಸಂಪನ್ಮೂಲಗಳನ್ನು ಮೌಲ್ಯಮಾಪನ ಮಾಡುತ್ತದೆ.
ISFR 2021 ವರದಿಯ ಪ್ರಕಾರ ಅರಣ್ಯ ಪ್ರದೇಶ ಮತ್ತು ಮರಗಳ ಹೊದಿಕೆಯು 24.62% ರಷ್ಟಿದೆ. ಒಟ್ಟು ಅರಣ್ಯ ಪ್ರದೇಶವು 7,13,789 ಚ.ಕಿ.ಮೀ ಆಗಿತ್ತು, ಇದು ದೇಶದ ಭೌಗೋಳಿಕ ಪ್ರದೇಶದ 21.71% ಆಗಿದೆ. ಟ್ರೀ ಕವರ್ ದೇಶದ ಭೌಗೋಳಿಕ ಪ್ರದೇಶದ 2.91% ಆಗಿದೆ.
