ಹೊನ್ನಾಳಿ:
ತಾಲೂಕಿನ ನೆಲಹೊನ್ನೆ ಗ್ರಾಮದಲ್ಲಿ ಸೆ.18ರ ಮಂಗಳವಾರ ಬಾಳೆಹೊನ್ನೂರಿನ ರಂಭಾಪುರಿ ಪೀಠದ ಜಗದ್ಗುರುಗಳಾದ ಶ್ರೀ ಪ್ರಸನ್ನ ರೇಣುಕ ಡಾ. ವೀರ ಸೋಮೇಶ್ವರ ರಾಜದೇಶಿಕೇಂದ್ರ ಶಿವಾಚಾರ್ಯ ಮಹಾಸ್ವಾಮೀಜಿ ಅವರ “ಅಡ್ಡಪಲ್ಲಕ್ಕಿ ಉತ್ಸವ” ಸಹಸ್ರಾರು ಭಕ್ತರ ಸಮ್ಮುಖದಲ್ಲಿ ಸಡಗರ-ಸಂಭ್ರಮಗಳಿಂದ ನೆರವೇರಿತು.
ನೆಲಹೊನ್ನೆ ಗ್ರಾಮದ ಪ್ರತಿಯೊಂದು ಬೀದಿಗಳಲ್ಲೂ ಸಂಚರಿಸಿದ “ಅಡ್ಡಪಲ್ಲಕ್ಕಿ ಉತ್ಸವ”ಕ್ಕೆ ಭಕ್ತರು ಶಿರಸಾಷ್ಟಾಂಗ ಪ್ರಣಾಮಗಳನ್ನು ಅರ್ಪಿಸುತ್ತಾ, ರಂಭಾಪುರಿ ಜಗದ್ಗುರುಗಳ ಆಶೀರ್ವಾದ ಪಡೆದುಕೊಂಡರು. ಗ್ರಾಮದ ಇತಿಹಾಸದಲ್ಲಿ ಇದೇ ಮೊದಲು ಪಂಚಪೀಠಗಳ ಜಗದ್ಗುರುಗಳೊಬ್ಬರು ಆಗಮಿಸಿ, ಭಕ್ತರನ್ನು ಹರಸಿದ್ದು ವಿಶೇಷವಾಗಿತ್ತು. ಬಸವಾಪಟ್ಟಣ ಗವಿಮಠ, ರಾಂಪುರ ಬೃಹನ್ಮಠದ ವಿಶ್ವೇಶ್ವರ ಶಿವಾಚಾರ್ಯ ಹಾಲಸ್ವಾಮೀಜಿ ಮತ್ತು ಹೊಟ್ಯಾಪುರ ಹಿರೇಮಠದ ಗಿರಿಸಿದ್ಧೇಶ್ವರ ಶಿವಾಚಾರ್ಯ ಸ್ವಾಮೀಜಿ “ಅಡ್ಡಪಲ್ಲಕ್ಕಿ ಉತ್ಸವ”ದ ನೇತೃತ್ವ ವಹಿಸಿದ್ದರು.
ಎಪಿಎಂಸಿ ಉಪಾಧ್ಯಕ್ಷೆ ರೂಪಾ ದೇವರಾಜ್, ಜಿಪಂ ಸದಸ್ಯೆ ಉಮಾ ರಮೇಶ್, ಜಿಲ್ಲಾ ಜೆಡಿಎಸ್ ಅಧ್ಯಕ್ಷ ಬಿ. ಚಿದಾನಂದಪ್ಪ, ತಾಲೂಕು ಬಿಜೆಪಿ ಮಾಜಿ ಅಧ್ಯಕ್ಷ ಅರಕೆರೆ ಎ.ಬಿ. ಹನುಮಂತಪ್ಪ, ನೆಲಹೊನ್ನೆ ಗ್ರಾಮದ ನಿವೃತ್ತ ಉಪನ್ಯಾಸ ಏಕಾಂತರಾವ್, ಮುಖಂಡರಾದ ಎನ್.ಜಿ. ರಾಜೇಂದ್ರ, ಡಿ.ಎಂ. ಮಂಜುಳಾ, ಎಚ್.ಬಿ. ದೇವರಾಜ್, ಎಂ.ಪಿ. ರಮೇಶ್, ಜಿ.ಎಸ್. ಪ್ರಭು ಪಾಟೀಲ್, ಎಸ್.ಆರ್. ಈಶ್ವರಪ್ಪ, ಎನ್.ಎಂ. ಮೋಹನ್, ಎಂ.ಸಿ. ನಾಗರಾಜ್, ಎಸ್.ಪಿ. ರಾಜು ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.
ನೆಲಹೊನ್ನೆ, ಕುಂದೂರು, ಕುಂಬಳೂರು ಸೇರಿದಂತೆ ಸುತ್ತ-ಮುತ್ತಲಿನ ಅನೇಕ ಗ್ರಾಮಗಳ ಸಹಸ್ರಾರು ಭಕ್ತರು ಭಾಗವಹಿಸಿದ್ದರು.
ಪ್ರಜಾಪ್ರಗತಿಯಿಂದ ತಾಜಾ ಸುದ್ದಿಗಾಗಿ ಪ್ರಜಾಪ್ರಗತಿ facebook page ಲೈಕ್ ಮಾಡಿ
