ಚೀನಾ ಜನರ ಸದ್ಯದ ಪರಿಸ್ಥಿತಿ ನೋಡಿದ್ರೆ ಬೆಚ್ಚಿಬೀಳೋದು ಗ್ಯಾರೆಂಟಿ..

      ಚೀನಾದಲ್ಲಿ ಸದ್ಯ ಕೋವಿಡ್​ ಶೂನ್ಯ ನಿಯಮವನ್ನು ಪಾಲಿಸಲಾಗುತ್ತಿದೆ.

ಶಂಕಿತ ಕರೊನಾ ಸೋಂಕಿತರನ್ನು ಒಂದೆಡೆ ಕ್ವಾರಂಟೈನ್​ ಮಾಡಲು ಲೋಹದ ಬಾಕ್ಸ್​ನಿಂದ ತಯಾರದ ಸಾಲು ಸಾಲು ಮನೆಗಳನ್ನು ಇರಿಸಲಾಗಿದೆ.

ಅಲ್ಲದೆ, ಸಾಲು ಸಾಲು ಬಸ್​ಗಳು ಜನರನ್ನು ತುಂಬಿಕೊಂಡು ಕ್ವಾರಂಟೈನ್​ ಕ್ಯಾಂಪ್​ಗಳತ್ತ ಬರುತ್ತಿದ್ದು, ಇದಕ್ಕೆ ಸಂಬಂಧಿಸಿದ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ವೈರಲ್​ ಆಗುತ್ತಿದ್ದು, ಚೀನಾ ಪರಿಸ್ಥಿತಿಯನ್ನು ನೋಡಿ ಆತಂಕಪಡುವಂತಾಗಿದೆ.

ಬೀಜಿಂಗ್​ನಲ್ಲಿ ಮುಂದಿನ ತಿಂಗಳು ನಡೆಯಲಿರುವ ಚಳಿಗಾಲದ ಒಲಿಂಪಿಕ್ಸ್​ಗೆ ಭಾರೀ ಸಿದ್ಧತೆಯ ನಡುವೆಯೂ ಶೂನ್ಯ ಕೋವಿಡ್​ ನಿಯಮದ ಅಡಿಯಲ್ಲಿ ಲಕ್ಷಾಂತರ ಮಂದಿಯನ್ನು ಕ್ವಾರಂಟೈನ್​ನಲ್ಲಿ ಇಟ್ಟಿದೆ.

ಗರ್ಭಿಣಿಯರು, ಮಕ್ಕಳು, ಹಿರಿಯ ನಾಗರಿಕರು ಸೇರಿದಂತೆ ಅನೇಕ ಮಂದಿಯನ್ನು ಬಲವಂತವಾಗಿ ಮರದ ಹಾಸಿಗೆ ಮತ್ತು ಶೌಚಾಲಯದೊಂದಿಗೆ ಸುಸಜ್ಜಿತವಾದ ಲೋಹದ ಮನೆಗಳಲ್ಲಿ ಇರಿಸಲಾಗಿದೆ. ಒಂದು ಪ್ರದೇಶದಲ್ಲಿ ಒಬ್ಬರಿಗೆ ಸೋಂಕು ಕಾಣಿಸಿಕೊಂಡರೆ ಅಲ್ಲಿರುವ ಎಲ್ಲರನ್ನು ಎರಡು ವಾರಗಳ ಕಾಲ ಕ್ವಾರಂಟೈನ್​ನಲ್ಲಿ ಇಡಲಾಗುತ್ತಿದೆ.

ಚೀನಾದ ಹಲವಾರು ಪ್ರದೇಶಗಳಲ್ಲಿ, ಮಧ್ಯರಾತ್ರಿಯ ನಂತರ ನಿವಾಸಿಗಳು ತಮ್ಮ ಮನೆಗಳನ್ನು ತೊರೆದು ಕ್ವಾರಂಟೈನ್ ಕೇಂದ್ರಗಳಿಗೆ ಹೋಗಬೇಕೆಂದು ಸರ್ಕಾರ ಸೂಚನೆ ನೀಡಿದೆ.

ಟ್ರ್ಯಾಕ್ ಮತ್ತು ಟ್ರೇಸ್ ಅಪ್ಲಿಕೇಶನ್‌ಗಳನ್ನು ಚೀನಾದಲ್ಲಿ ಕಡ್ಡಾಯ ಮಾಡಲಾಗಿದ್ದು, ಕೋವಿಡ್​ ಸೋಂಕಿತನ ನಿಕಟ ಸಂಪರ್ಕಗಳನ್ನು ಪತ್ತೆಹಚ್ಚಿ, ತ್ವರಿತವಾಗಿ ಕ್ವಾರಂಟೈನ್ ಮಾಡಲಾಗುತ್ತದೆ.

ಚೀನಾದಲ್ಲಿ ಸುಮಾರು 20 ಮಿಲಿಯನ್​ (2 ಕೋಟಿ) ಮಂದಿಯನ್ನು ಅವರವರ ಮನೆಯಲ್ಲಿ ಬಂಧಿಸಲಾಗಿದೆ. ಆಹಾರ ಪದಾರ್ಥ ಖರೀದಿಸಲೂ ಸಹ ಹೊರಗಡೆ ಬಿಡುತ್ತಿಲ್ಲ. ಕಠಿಣ ನಿಯಮಗಳ ಪರಿಣಾಮ ಸರಿಯಾದ ಸಮಯಕ್ಕೆ ಚಿಕಿತ್ಸೆ ದೊರೆಯದೇ ಗರ್ಭಿಣಿಯೊಬ್ಬರಿಗೆ ಗರ್ಭಪಾತವಾದ ಅಮಾನವೀಯ ಘಟನೆಗೂ ಚೀನಾ ಸಾಕ್ಷಿಯಾಗಿದೆ.

         ಚೀನಾದಲ್ಲಿ 2019ರಲ್ಲಿ ಮೊದಲ ಬಾರಿಗೆ ಕರೊನಾ ವೈರಸ್​ ಪತ್ತೆಯಾಯಿತು. ವೇಗವಾಗಿ ವೈರಸ್​ ಹರಡುವುದನ್ನು ತಡೆಯಲು ಚೀನಾ ಡೈನಾಮಿಕ್​ ಶೂನ್ಯ ಎಂದು ಕರೆಯಲ್ಪಡುವ ಸೂತ್ರವನ್ನು ಎಣೆದಿದೆ.

ಇದರ ಅಡಿಯಲ್ಲಿ ಕಟ್ಟುನಿಟ್ಟಾದ ಲಾಕ್​ಡೌನ್​ ನಿಯಮಗಳು ಮತ್ತು ತಕ್ಷಣ ಸಾಮೂಹಿಕ ಕರೊನಾ ಪರೀಕ್ಷೆಗೆ ಒಳಪಡಿಸಲಾಗುತ್ತದೆ.

ಬೇರೆಡೆ ಮೃದುವಾದ ಲಾಕ್‌ಡೌನ್‌ಗಳಿಗಿಂತ ಚೀನಾದ ಲಾಕ್​ಡೌನ್​ ಭಿನ್ನವಾಗಿದೆ. ಜನರು ತಮ್ಮ ಕಟ್ಟಡಗಳನ್ನು ತೊರೆಯುವುದನ್ನು ನಿಷೇಧಿಸಲಾಗಿದೆ ಮತ್ತು ಅದಕ್ಕೂ ಹೆಚ್ಚಿನ ಅಪಾಯದ ಸಂಪರ್ಕಗಳೆಂದು ಪರಿಗಣಿಸಿದರೆ ಹೋಟೆಲ್ ಕೊಠಡಿಗಳಲ್ಲಿ ಉಳಿಯಲು ಒತ್ತಾಯಿಸುವ ಸಾಧ್ಯತೆಯು ಚೀನಾದಲ್ಲಿ ಇದೆ. ಒಟ್ಟಾರೆ ಶೂನ್ಯ ಕೋವಿಡ್​ ನಿಯಮದ ಅಡಿಯಲ್ಲಿ ಕಠಿಣ ಕ್ರಮಗಳನ್ನು ಚೀನಾ ತೆಗೆದುಕೊಂಡಿದೆ

ಪ್ರಜಾಪ್ರಗತಿಯಿಂದ ತಾಜಾ ಸುದ್ದಿಗಾಗಿ ಪ್ರಜಾಪ್ರಗತಿ facebook page ಲೈಕ್ ಮಾಡಿ