ಹೈದರಾಬಾದ್
ಆಂಧ್ರಪ್ರದೇಶ ರಾಜ್ಯದ ವಿಭಜನೆಯಾದ ಬಳಿಕ ಹೈದರಾಬಾದ್ ಗೆ ನೀಡಲಾಗಿದ್ದ ತೆಲಂಗಾಣ- ಆಂಧ್ರದ ಜಂಟಿ ರಾಜಧಾನಿ ಸ್ಥಾನ ಇಂದಿನಿಂದ ಕೊನೆಗೊಳ್ಳಲಿದೆ. ಆಂಧ್ರಪ್ರದೇಶ ಮರುಸಂಘಟನೆ ಕಾಯ್ದೆ 2014 ಪ್ರಕಾರ, ಹೈದರಾಬಾದ್ ತೆಲಂಗಾಣ- ಆಂಧ್ರಪ್ರದೇಶದ ಜಂಟಿ ರಾಜಧಾನಿಯಾಗಿ 10 ವರ್ಷಗಳ ಕಾಲ ಕಾರ್ಯನಿರ್ವಹಿಸಬೇಕೆಂಬ ನಿಬಂಧನೆ ಇತ್ತು.
ಜೂ.02, 2024 ರಿಂದ ಹೈದರಾಬಾದ್ ತೆಲಂಗಾಣಕ್ಕೆ ಮಾತ್ರ ರಾಜಧಾನಿಯಾಗಿರಲಿದೆ. ಆಂಧ್ರ-ತೆಲಂಗಾಣವನ್ನು 2014 ರಲ್ಲಿ ಪ್ರತ್ಯೇಕಗೊಳಿಸಲಾಗಿತ್ತು.ಆಂಧ್ರಪ್ರದೇಶಕ್ಕೆ ಹೊಸ ರಾಜಧಾನಿ ಈ ವೇಳೆಗೆ ಸೃಷ್ಟಿಯಾಗಬೇಕಿತ್ತಾದರೂ ಅಲ್ಲಿ ಮೂರು ರಾಜಧಾನಿಗಳನ್ನಿಟ್ಟುಕೊಂಡು ರಾಜ್ಯ ಅಸ್ಥಿರತೆ ಎದುರಿಸುತ್ತಿದೆ.
ಆಂಧ್ರಪ್ರದೇಶ ಸರ್ಕಾರಕ್ಕೆ 10 ವರ್ಷಗಳ ಕಾಲ ಬಿಟ್ಟುಕೊಡಲಾಗಿದ್ದ ಸರ್ಕಾರಿ ಅತಿಥಿಗೃಹಗಳಂತಹ ಕಟ್ಟಡಗಳನ್ನು ತಮ್ಮ ಸರ್ಕಾರದ ಸುಪರ್ದಿಗೆ ತೆಗೆದುಕೊಳ್ಳುವಂತೆ ಅಧಿಕಾರಿಗಳಿಗೆ ತೆಲಂಗಾಣ ಸಿಎಂ ರೇವಂತ್ ರೆಡ್ಡಿ ಸೂಚನೆ ನೀಡಿದ್ದರು.ರಾಜ್ಯ ವಿಭಜನೆಯಾಗಿ 10 ವರ್ಷಗಳೇ ಕಳೆದರೂ ಆಂಧ್ರ-ತೆಲಂಗಾಣದ ನಡುವೆ ಹಲವು ವಿಷಯಗಳು ಇನ್ನೂ ಇತ್ಯರ್ಥವಾಗದೇ ಹಾಗೆಯೇ ಉಳಿದಿವೆ.
