ಕೇರಳ ಕರಾವಳಿಯಲ್ಲಿ ಸಿಂಗಾಪುರದ ಹಡಗು ಸ್ಫೋಟ- ನಾಲ್ವರು ಸಿಬ್ಬಂದಿ ನಾಪತ್ತೆ

ಕೊಚ್ಚಿ:

     ಕೇರಳದ ಕೋಝಿಕೋಡ್  ಜಿಲ್ಲೆಯ ಬೆಯ್ಪೋರ್ ಕರಾವಳಿಯಲ್ಲಿ ಸಿಂಗಾಪುರ ಧ್ವಜದ ಕಂಟೇನರ್ ಹಡಗು ‘MV Wan Hai 503’ನಲ್ಲಿ ಸೋಮವಾರ ಬೆಳಗ್ಗೆ 10:30ಕ್ಕೆ ಸ್ಫೋಟದಿಂದ ಬೆಂಕಿ ಕಾಣಿಸಿಕೊಂಡಿದ್ದು, ನಾಲ್ವರು ಸಿಬ್ಬಂದಿ ನಾಪತ್ತೆಯಾಗಿದ್ದಾರೆ ಮತ್ತು ಐವರು ಗಾಯಗೊಂಡಿದ್ದಾರೆ. ಮುಂಬೈನ ಮಾರಿಟೈಮ್ ಆಪರೇಷನ್ಸ್ ಸೆಂಟರ್  ಈ ಘಟನೆಯನ್ನು ಕೊಚ್ಚಿಯ ತನ್ನ ಸಹವರ್ತಿಗಳಿಗೆ ವರದಿ ಮಾಡಿದೆ.

    ಮೂಲಗಳ ಪ್ರಕಾರ, ಸ್ಫೋಟದಿಂದ 20 ಕಂಟೇನರ್‌ಗಳು ಸಮುದ್ರಕ್ಕೆ ಬಿದ್ದಿವೆ. ಹಡಗಿನಲ್ಲಿ 22 ಸಿಬ್ಬಂದಿಗಳಿದ್ದು, 18 ಜನರು ಸಮುದ್ರಕ್ಕೆ ಜಿಗಿದಿದ್ದಾರೆ. ಇದುವರೆಗೆ 18 ಜನರನ್ನು ರಕ್ಷಿಸಲಾಗಿದ್ದು, ನಾಪತ್ತೆಯಾದ ನಾಲ್ವರು ವಿದೇಶೀ ಸಿಬ್ಬಂದಿಯನ್ನು ಪತ್ತೆಹಚ್ಚಲು ಶೋಧ ಕಾರ್ಯಾಚರಣೆ ನಡೆಯುತ್ತಿದೆ.

    ಭಾರತೀಯ ನೌಕಾಪಡೆ ಮತ್ತು ಕರಾವಳಿ ರಕ್ಷಣಾ ದಳವು ರಕ್ಷಣಾ ಕಾರ್ಯಾಚರಣೆಗೆ ತಕ್ಷಣ ಕ್ರಮ ಕೈಗೊಂಡಿದೆ. ನೌಕಾಪಡೆಯು INS ಸೂರತ್‌ನ್ನು ತಿರುಗಿಸಲಾಗಿದೆ. ಕರಾವಳಿ ರಕ್ಷಣಾ ದಳವು CG ಡಾರ್ನಿಯರ್ ಸೇರಿದಂತೆ ಹಲವು ಸಂಪನ್ಮೂಲಗಳನ್ನು ರಕ್ಷಣೆ ಮತ್ತು ಮೌಲ್ಯಮಾಪನಕ್ಕಾಗಿ ನಿಯೋಜಿಸಿದೆ. 

     ಕರಾವಳಿ ರಕ್ಷಣಾ ದಳದ ಮಾಹಿತಿಯ ಆಧಾರದ ಮೇಲೆ, ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ರಾಜ್ಯ ವಿಪತ್ತು ನಿರ್ವಹಣಾ ಪ್ರಾಧಿಕಾರಕ್ಕೆ ಎರ್ನಾಕುಲಂ ಮತ್ತು ಕೋಝಿಕೋಡ್ ಜಿಲ್ಲಾಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ. ಸಿಬ್ಬಂದಿಯನ್ನು ಕೇರಳ ಕರಾವಳಿಗೆ ಕರೆತಂದರೆ, ಅವರಿಗೆ ವೈದ್ಯಕೀಯ ಚಿಕಿತ್ಸೆಗೆ ಅಗತ್ಯ ವ್ಯವಸ್ಥೆ ಮಾಡಲು ಆದೇಶಿಸಲಾಗಿದೆ.

‘MV Wan Hai 503’ ಶ್ರೀಲಂಕಾದ ಕೊಲಂಬೊದಿಂದ ಮಹಾರಾಷ್ಟ್ರದ ಬಂದರಿಗೆ ತೆರಳುತ್ತಿತ್ತು. 270 ಮೀಟರ್ ಉದ್ದದ ಈ ಹಡಗು ಜೂನ್ 7ರಂದು ಕೊಲಂಬೊದಿಂದ ಹೊರಟು ಜೂನ್ 10ರಂದು ಮುಂಬೈ ತಲುಪಬೇಕಿತ್ತು.