ವಾಷಿಂಗ್ಟನ್:
ಆರ್ಥಿಕವಾಗಿ ದಿವಾಳಿಯಾಗಿರುವ ಪಾಕಿಸ್ತಾನಕ್ಕೆ ಅಮೆರಿಕ ಮತ್ತೊಂದು ಹೊಡೆತವನ್ನು ನೀಡಿದ್ದು, ಪಾಕ್ಗೆ ನೀಡುವ ಆರ್ಥಿಕ ನೆರವಿನಲ್ಲಿ 440 ಮಿಲಿಯನ್ ಡಾಲರ್ ಕಡಿತ ಮಾಡಲಾಗಿದೆ ಎಂದು ಶ್ವೇತ ಭವನ ತಿಳಿಸಿದೆ.
ಪಾಕಿಸ್ತಾನ ಬಲವರ್ಧನೆ ಪಾಲುದಾರಿಕೆ ಒಪ್ಪಂದ 2010 ರ ಅನ್ವಯ ಪಾಕಿಸ್ತಾನಕ್ಕೆ ನೆರವು ನೀಡಲು ಅಮೆರಿಕ ನಿರ್ಧರಿಸಿತ್ತು . 2010 ರಲ್ಲಿ ಅಮೆರಿಕ ಮತ್ತು ಪಾಕಿಸ್ತಾನ ಒಪ್ಪಂದಕ್ಕೆ ಸಹಿ ಹಾಕಿದ್ದವು. ಅದರ ಅನ್ವಯ ಕೆರ್ರಿ ಲ್ಯೂಗರ್ ಬರ್ಮನ್ (ಕೆಎಲ್ಬಿ) ಕಾಯ್ದೆ ಅನ್ವಯ 5 ವರ್ಷಗಳ ಅವಧಿಯಲ್ಲಿ 7.5 ಬಿಲಿಯನ್ ಡಾಲರ್ ನೆರವು ನೀಡಲು ಅಮೆರಿಕ ಕಾಂಗ್ರೆಸ್ ಒಪ್ಪಿಗೆ ನೀಡಿತ್ತು.ಪ್ರಸ್ತುತ ಕೆಎಲ್ಬಿ ಕಾಯ್ದೆ ಅನ್ವಯ ಪಾಕಿಸ್ತಾನಕ್ಕೆ 4.5 ಬಿಲಿಯನ್ ಡಾಲರ್ ನೆರವು ನೀಡಬೇಕಿತ್ತು. ಅದರಲ್ಲಿ 440 ಮಿಲಿಯನ್ ಡಾಲರ್ ನೆರವನ್ನು ಕಡಿತ ಮಾಡಲಾಗಿದೆ. ಈ ಹಿನ್ನೆಲೆಯಲ್ಲಿ ಅಮೆರಿಕ ಕೇವಲ 4.1 ಬಿಲಿಯನ್ ಡಾಲರ್ ನೆರವು ನೀಡಲಿದೆ.
ಪಾಕ್ ಪ್ರಧಾನಿ ಇಮ್ರಾನ್ ಖಾನ್ ಇತ್ತೀಚೆಗೆ ಅಮೆರಿಕ ಪ್ರವಾಸ ಕೈಗೊಂಡಿದ್ದರು. ಈ ವೇಳೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಜತೆ ಮಾತುಕತೆ ನಡೆಸಿ ಪಾಕ್ಗೆ ಹೆಚ್ಚಿನ ನೆರವು ನೀಡುವಂತೆ ಮನವಿ ಮಾಡಿದ್ದರು. ಆದರೆ, ಈಗ ಮತ್ತಷ್ಟು ಆರ್ಥಿಕ ನೆರವನ್ನು ಕಡಿತ ಮಾಡುವ ತೀರ್ಮಾನಕ್ಕೆ ಬಂದಿದೆ.
ಉಗ್ರರ ವಿರುದ್ಧ ಸಮರ್ಪಕ ಕ್ರಮ ತೆಗೆದುಕೊಳ್ಳುವಲ್ಲಿ ವಿಫಲವಾದ ಹಿನ್ನೆಯಲ್ಲಿ ಅಮೆರಿಕ ಕಳೆದ ವರ್ಷದ ಸೆಪ್ಟಂಬರ್ನಲ್ಲಿ 300 ಮಿಲಿಯನ್ ಡಾಲರ್ ನೆರವು ಕಡಿತ ಮಾಡಿತ್ತು. ಈ ವರ್ಷದ ಜನವರಿಯಲ್ಲಿ ಪೆಂಟಗಾನ್ ಮತ್ತೆ 1 ಬಿಲಿಯನ್ ಡಾಲರ್ ನೆರವನ್ನು ಕಡಿತ ಮಾಡಿತ್ತು. ಈ ಹಿನ್ನೆಲೆಯಲ್ಲಿ ಒಟ್ಟು 1.3 ಬಿಲಿಯನ್ ಡಾಲರ್ ನೆರವು ಕಡಿತಗೊಂಡಿತ್ತು.
