ರಾಯಪಟ್ಟಣ
ವೈಲ್ಡ್‌ಲೈಫ್ ರಿಸರ್ಚ್ ಅಂಡ್ ಕನ್ಸರ್ವೇಶನ್ ಸೊಸೈಟಿ ಹಾಗೂ ಹಳಿಯಾಳ ವಿಭಾಗದ ಅರಣ್ಯ ಇಲಾಖೆಯ ಸಹಯೋಗದಲ್ಲಿ, ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆ, ರಾಯಪಟ್ಟಣದಲ್ಲಿ ವಿಶ್ವ ಆನೆ ದಿನಾಚರಣೆಯನ್ನು ಉತ್ಸಾಹದಿಂದ ಆಚರಿಸಲಾಯಿತು. ಈ ಕಾರ್ಯಕ್ರಮವು ವಿದ್ಯಾರ್ಥಿಗಳು, ಅರಣ್ಯ ಅಧಿಕಾರಿಗಳು ಹಾಗೂ ಸ್ಥಳೀಯ ಸಮುದಾಯವನ್ನು ಒಗ್ಗೂಡಿಸಿ, ಕರ್ನಾಟಕದ ರಾಜ್ಯ ಪ್ರಾಣಿ — ಏಷ್ಯನ್ ಆನೆ — ಸಂರಕ್ಷಣೆಯ ಮಹತ್ವವನ್ನು ಪ್ರಸ್ತುತಪಡಿಸಿ, ಮಾನವ–ಆನೆ ಸಂಘರ್ಷ ನಿವಾರಣೆಯ ಪರಿಹಾರಗಳನ್ನು ಚರ್ಚಿಸಲು ವೇದಿಕೆಯನ್ನು ಒದಗಿಸಿತು.
ಕಾರ್ಯಕ್ರಮವು ಪ್ರಾರ್ಥನೆ ಹಾಗೂ ಉದ್ಘಾಟನಾ ಸಮಾರಂಭದಿಂದ ಆರಂಭವಾಯಿತು. ಅತಿಥಿಗಳಾದ ವಲಯ ಅರಣ್ಯಾಧಿಕಾರಿ ಸಂಗಮೇಶ್ ಪಾಟೀಲ್, ಶಾಲಾ ಮುಖ್ಯೋಪಾಧ್ಯಾಯರು ಲಿಂಗಪ್ಪ ಆರ್., ಪಂಚಾಯತ್ ಸದಸ್ಯ ಈಶ್ವರ ಇಂಜೋಲ್ಕರ್ ಹಾಗೂ ಶಿಕ್ಷಕರಾದ ಆನಂದ್ ಮತ್ತು ಜಾನು ಇವರನ್ನು ಆತ್ಮೀಯವಾಗಿ ಬರಮಾಡಿಕೊಳ್ಳಲಾಯಿತು.
ಸಭೆಯನ್ನುದ್ದೇಶಿಸಿ ಮಾತನಾಡಿದ RFO ಪಾಟೀಲ್ ಅವರು, ಅರಣ್ಯಗಳ ಮಹತ್ವ, ಆನೆಗಳ ಪರಿಸರ ಪಾತ್ರ ಹಾಗೂ WRCS ಸಂಸ್ಥೆಯ ಹಾನಿಕರರಹಿತ ಸಂಘರ್ಷ ನಿವಾರಣಾ ಕ್ರಮಗಳು — ಟ್ರಿಪ್ ಅಲಾರಾಂ, ಮೆಣಸಿನಕಾಯಿ ನಿರೋಧಕಗಳು, ಮತ್ತು ಕಡುವಾಸನೆ ನಿರೋಧಕಗಳ ಬಗ್ಗೆ ಮಾಹಿತಿ ನೀಡಿದರು. ಇಂತಹ ಕ್ರಮಗಳು ಜನರು ಮತ್ತು ಆನೆಗಳು ಶಾಂತಿಯುತವಾಗಿ ಬದುಕಲು ಅಗತ್ಯವೆಂದು ಹೇಳಿದರು.
ನಂತರ ಮಾತನಾಡಿದ WRCS ತಂಡದ ಅಮಿತ್ ಕುಮಾರ್, ಅಜಿಂಕ್ಯ ಬಾಗಲ್, ನರೇಂದ್ರ ನರೋಜೆ ಮತ್ತು ನಿತ್ಯಶ್ರೀ ಅವರು ವಿದ್ಯಾರ್ಥಿಗಳಿಗೆ ಮಾಹಿತಿ ನೀಡುವ ಪ್ರಸ್ತುತಿ ಹಾಗೂ ಆನೆಗಳ ಕುರಿತಾದ ಚಲನಚಿತ್ರವನ್ನು ಪ್ರದರ್ಶಿಸಿ, ಆನೆಗಳ ವರ್ತನೆ ಹಾಗೂ ಸಹಬಾಳ್ವೆಯ ಸವಾಲುಗಳನ್ನು ಪರಿಚಯಿಸಿದರು.
ವಿದ್ಯಾರ್ಥಿಗಳು ಮಣ್ಣಿನ ಆನೆ ಮಾದರಿ ತಯಾರಿಕೆ, ತ್ಯಾಜ್ಯ ವಸ್ತುಗಳಿಂದ ಕಲೆ ನಿರ್ಮಾಣ, ಮುಖವಾಡ ತಯಾರಿಕೆ, ಆನೆ ಆಕೃತಿಯ ಮೆಹೆಂದಿ, ಚಿತ್ರಕಲೆ ಸ್ಪರ್ಧೆ ಮುಂತಾದ ಚಟುವಟಿಕೆಗಳಲ್ಲಿ ತಮ್ಮ ಸೃಜನಶೀಲತೆಯನ್ನು ಪ್ರದರ್ಶಿಸಿದರು. ಶಿಕ್ಷಕರು ಹಾಗೂ WRCS ತಂಡದ ಮಾರ್ಗದರ್ಶನದಲ್ಲಿ, ಈ ಚಟುವಟಿಕೆಗಳು ಮನರಂಜನೆಯೊಂದಿಗೆ ಪರಿಸರ ಜಾಗೃತಿ ಮೂಡಿಸುವ ಕೆಲಸವಾಯಿತು “ಆನೆಗಳನ್ನು ಕಾಪಾಡುವುದು ಮತ್ತು ಸಮುದಾಯವನ್ನು ರಕ್ಷಿಸುವುದು ಕೈಕೈ ಹಿಡಿದಂತೆ ಸಾಗಬೇಕು” ಎಂಬ ಸಂದೇಶವನ್ನು ಸಾರಲಾಯಿತು .
ವಿಶ್ವ ಆನೆ ದಿನದ ಅಂಗವಾಗಿ WRCS ನಿರ್ದೇಶರಾದ ಜಯಂತ್ ಕುಲಕರ್ಣಿಮಾತನಾಡಿ. “ಈ ವಿಶ್ವ ಆನೆ ದಿನದಲ್ಲಿ ನಾವು ನಮ್ಮ ರಾಜ್ಯ ಪ್ರಾಣಿಯ ಸೌಂದರ್ಯವನ್ನು ಮಾತ್ರವಲ್ಲ, ಜನರು ಮತ್ತು ಆನೆಗಳು ಸುರಕ್ಷಿತವಾಗಿ ಬದುಕಲು ಉಪಯೋಗಿಸಬಹುದಾದ ಪ್ರಾಯೋಗಿಕ ಮಾರ್ಗಗಳನ್ನು ಹಂಚಿಕೊಂಡೆವು. ವಿದ್ಯಾರ್ಥಿಗಳ ಸೃಜನಶೀಲತೆ ಮತ್ತು ಉತ್ಸಾಹ ನಮಗೆ ಸಂರಕ್ಷಣೆಯ ಭವಿಷ್ಯಕ್ಕಾಗಿ ಆಶಾಕಿರಣವನ್ನು ನೀಡುತ್ತದೆ.”
“ಆನೆಗಳು ಜ್ಞಾನ ಮತ್ತು ಪ್ರಕೃತಿಯ ಸಮರಸ್ಯದ ಸಂಕೇತ. ಟ್ರಿಪ್ ಅಲಾರ್ಮ್, ಮೆಣಸಿನಕಾಯಿ ನಿರೋಧಕಗಳು, ಜೈವಿಕ ಬೇಲಿ ಮುಂತಾದ ಪರಿಹಾರಗಳ ಬಗ್ಗೆ ತಿಳಿದುಕೊಳ್ಳುವ ಮೂಲಕ, ನಾವು ಶಾಂತಿಯುತ ಸಹಬಾಳ್ವೆಯತ್ತ ಹೆಜ್ಜೆ ಇಡುತ್ತೇವೆ. ಇಂದಿನ ಆಚರಣೆ ಜಾಗೃತಿ ಮನರಂಜನೆಯೂ ಆಗಬಹುದು ಎಂಬುದನ್ನು ಸಾಬೀತುಪಡಿಸಿದೆ.”
