ಹಾವೇರಿ
ಭಾರತ ದೇಶವನ್ನು 2025ರ ವೇಳೆಗೆ ಮಲೇರಿಯಾ ಮುಕ್ತ ಮಾಡಲು ಉದ್ದೇಶಹೊಂದಲಾಗಿದೆ.” ಶೂನ್ಯ ಮಲೇರಿಯಾ ನನ್ನಿಂದ ಪ್ರಾರಂಭ” ಈ ವರ್ಷದ ಘೋಷಣೆಯಾಗಿದೆ. ಜಿಲ್ಲೆಯಾದ್ಯಂತ ಮಲೇರಿಯಾ ನಿಯಂತ್ರಣಕ್ಕೆ ಮುಂಜಾಗ್ರತಾ ಕಾರ್ಯಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ.ಎಚ್.ಎಸ್. ರಾಘವೇಂದ್ರಸ್ವಾಮಿ ಅವರು ತಿಳಿಸಿದರು.
ಗುರುವಾರ ನಗರದ ವಾರ್ತಾ ಭವನದಲ್ಲಿ ವಿಶ್ವ ಮಲೇರಿಯಾ ದಿನ ಕುರಿತು ಆಯೋಜಿಸಲಾದ ಮಾಧ್ಯಮಗೋಷ್ಠಿಯಲ್ಲಿ ಅವರು ಮಾತನಾಡಿದರು.
ಜಿಲ್ಲೆಯಲ್ಲಿ ಮಲೇರಿಯಾ ರೋಗ ಇಳಿಮುಖವಾಗುತ್ತಿದೆ. 2017 ರಲ್ಲಿ 70, 2018ರಲ್ಲಿ 35 ಹಾಗೂ 2019ರ ಈವರೆಗೆ ಕೇವಲ ಎರಡು ಮಲೇರಿಯಾ ವರದಿಗಳು ಪತ್ತೆಯಾಗಿವೆ. ಈ ರೋಗವು ಬರುವ ಜೂನ್, ಜುಲೈ ಹಾಗೂ ಆಗಸ್ಟ್ ಮಾಹೆಯಲ್ಲಿ ಅಧಿಕವಾಗುವ ಸಂಭವವಿದೆ. ಕಾರಣ ಮಲೇರಿಯಾ, ಡೆಂಗ್ಯು, ಚಿಕನ್‍ಗುನ್ಯಾ ರೋಗಗಳು ಉಲ್ಬಣವಾಗದಂತೆ ಮುಂಜಾಗೃತಾ ಕ್ರಮಗಳನ್ನು ಇಲಾಖೆಯಿಂದ ಕೈಗೊಳ್ಳಲಾಗುತ್ತಿದೆ. ಸಾರ್ವಜನಿಕರು ಆರೋಗ್ಯ ಇಲಾಖೆಯೊಂದಿಗೆ ಸಹಕರಿಸಲು ಕೋರಿದರು.
ಮಲೇರಿಯಾ ಅನಾಫೆಲೀಸ್ ಸೊಳ್ಳೆಯಿಂದ ಹರಡುತ್ತದೆ, ಇದು ಸಾಂಕ್ರಾಮಿಕ ರೋಗವಾಗಿದೆ. ಚಳಿ, ಜ್ವರ, ವಾಕರಿಕೆ, ಹೊಟ್ಟೆನೋವು, ಬೆವರಿನ ಮೂಲಕ ಜ್ವರ ಕಡಿಮೆಯಾಗುವುದು ಮಲೇರಿಯಾ ರೋಗದ ಲಕ್ಷಣಗಳಾಗಿವೆ. ಸಾರ್ವಜನಿಕರು ಮಲೇರಿಯಾ ರೋಗ ಹರಡದಂತೆ ಮುಂಜಾಗ್ರತೆ ಕ್ರಮಗಳನ್ನು ಕೈಗೊಳ್ಳಬೇಕು. ಆರೋಗ್ಯ ಇಲಾಖೆಯೊಂದಿಗೆ ಸಹಕರಿಸಬೇಕು ಎಂದು ತಿಳಿಸಿದರು.
ಮನೆ ಸುತ್ತಮತ್ತಲೂ ಸ್ವಚ್ಛತೆ ಕಾಪಾಡಿಕೊಳ್ಳಬೇಕು, ಸೊಳ್ಳೆಪರದೆ ಉಪಯೋಗಿಸಬೇಕು, ಬೇವಿನ ಸೊಪ್ಪಿನ ಹೊಗೆ ಹಾಕುವುದು ಹಾಗೂ ಸೊಳ್ಳಿಬತ್ತಿಗಳನ್ನು ಉಪಯೋಗಿಸಬೇಕು. ನೀರು ಶೇಖರಿಸಿದ ಟ್ಯಾಂಕ್‍ಗಳನ್ನು ವಾರಕ್ಕೊಮ್ಮೆ ಖಾಲಿ ಮಾಡಿ ಸ್ವಚ್ಛಗೊಳಿಸಬೇಕು, ಗಟಾರಗಳಲ್ಲಿ ನೀರು ಸರಾಗವಾಗಿ ಹರಿಯುವಂತೆ ಸ್ಥಳೀಯ ನಗರ ಸಂಸ್ಥೆಗಳು ಗಮನಹರಿಸಬೇಕು ಎಂದು ಮನವಿ ಮಾಡಿಕೊಂಡರು.
ಜಿಲ್ಲೆಯ 18 ಗ್ರಾಮಗಳಲ್ಲಿ 8,500 ಔಷಧಿಯುಕ್ತ ಸೊಳ್ಳೆ ಪರದೆಗಳನ್ನು ವಿತರಿಸಲಾಗಿದೆ. ಮುಂಜಾಗ್ರತಾ ಕ್ರಮಗಳ ಕುರಿತು ಶಾಲಾ ಮಕ್ಕಳಿಂದ ಜಾಗೃತಿ ಮೂಡಿಸಲಾಗುತ್ತಿದೆ. ಆರೋಗ್ಯ ಇಲಾಖೆಯಿಂದ ಪ್ರತಿ ಮಾಹೆಯ ಮೊದಲ ಹಾಗೂ ಮೂರನೇ ಶುಕ್ರವಾರ ಲಾರ್ವಾ ಸರ್ವೇ ಸಮೀಕ್ಷೆ ಕಾರ್ಯ ನಿರಂತರವಾಗಿ ನಡೆಸಲಾಗುತ್ತಿದೆ ಎಂದು ತಿಳಿಸಿದರು.
ಜಿಲ್ಲಾ ಮಲೇರಿಯಾ ನಿಯಂತ್ರಣಾಧಿಕಾರಿ ಡಾ.ಸುಹಿಲ್ ಹರವಿ ಅವರು ಮಲೇರಿಯಾ ರೋಗವನ್ನು ಗುಣಪಡಿಸಿಬಹುದು, ರೋಗದ ಲಕ್ಷಣಗಳು ಕಂಡಕೂಡಲೇ ನಿರ್ಲಕ್ಷ್ಯ ವಹಿಸದೇ ಸೂಕ್ತ ಚಿಕಿತ್ಸೆ ಪಡೆದುಕೊಳ್ಳಬೇಕು ಒಂದು ವೇಳೆ ಅಲಕ್ಸಿಸಿದರೆ ಸಾವು ಸಂಭವಿಸಬಹುದು. ಶಿಶುಗಳು ಮತ್ತು ಗರ್ಭಿಣಿಯರಿಗೆ ಮಲೇರಿಯಾ ರೋಗವು ಆತಂಕಕಾರಿಯಾಗಿದ್ದು, ಅಂತಹವರು ಯಾವುದೇ ಜ್ವರವಿರಲಿ ತಡಮಾಡದೇ ವೈದ್ಯರ ಸಲಹೆ ಪಡೆಯುವುದು ಅವಶ್ಯಕವಾಗಿದೆ ಎಂದು ತಿಳಿಸಿದರು.
ನೀರು ಶೇಖರಣಾ ತೊಟ್ಟಿಗಳನ್ನು ಮುಚ್ಚಳದಿಂದ ಮುಚ್ಚಿರಬೇಕು. ಗ್ರಾಮೀಣ ಭಾಗದಲ್ಲಿ ಸಿಬ್ಬಂದಿಗಳು ಡಿಡಿಟಿ ಸಿಂಪರಣೆ ಕಾರ್ಯಕ್ಕೆ ಮನೆಗಳಿಗೆ ಬಂದಾಗ ಸಂಪೂರ್ಣ ಸಹಕಾರ ನೀಡಬೇಕು. ಸೊಳ್ಳೆಗಳ ಉತ್ಪತ್ತಿ ತಾಣಗಳಲ್ಲಿ ಲಾರ್ವಾಹಾರಿ ಮೀನುಗಳಾದ ಗ್ಯಾಂಬೋಸಿಯ ಮತ್ತು ಗಪ್ಪಿ ಎಂಬ ಮೀನುಗಳನ್ನು ಬಿಡುವ ಮೂಲಕ ಲಾರ್ವಾ ನಾಶ ಮಾಡಲಗುತ್ತಿದೆ. ಉಡುಪಿ, ಮಂಗಳೂರ ಜಿಲ್ಲೆ ಹಾಗೂ ಪಕ್ಕದ ಗೋವಾ ರಾಜ್ಯದಲ್ಲಿ ಮಲೇರಿಯಾ ರೋಗ ಹೆಚ್ಚಾಗಿ ಕಂಡುಬರುತ್ತದೆ. ಕಾರಣ ಜಿಲ್ಲೆಯ ಜನತೆ ಈ ಪ್ರದೇಶಗಳಿಗೆ ಹೋಗಿ ಬಂದಾಗ ಕಡ್ಡಾಯವಾಗಿ ರಕ್ತಪರೀಕ್ಷೆ ಮಾಡಿಸಿಕೊಳ್ಳಬೇಕು. ಸಾರ್ವಜನಿಕರು ಕಸವನ್ನು ಚರಂಡಿಗೆ ಹಾಕದೇ ಕಸದ ತೊಟ್ಟಿಗಳಿಗೆ ಹಾಕಬೇಕು ಎಂದು ಮನವಿ ಮಾಡಿಕೊಂಡರು.
ಕೀಟತಜ್ಞೆ ಶ್ರೀಮತಿ ಇಂದಿರಾ ಪಾಟೀಲ ಅವರು ಮಾತನಾಡಿ, ನಿಂತ ನೀರಿನಲ್ಲಿ 24 ರಿಂದ 48 ಗಂಟೆಗಳಲ್ಲಿ ಮೊಟ್ಟೆಗಳು, ಏಳು ದಿನದಲ್ಲಿ ಲಾರ್ವಾ ಹಾಗೂ 24 ತಾಸಿನಲ್ಲಿ ಸೊಳ್ಳೆಗಳು ತನ್ನ ರೂಪ ಪಡೆದುಕೊಳ್ಳುತ್ತವೆ. 32 ರಿಂದ 42 ದಿನಗಳ ವಾತಾವರಣ ದಲ್ಲಿರುತ್ತವೆ. ಅನಾಫೆಲೀಸ್ ಸೊಳ್ಳೆ ಪ್ರಾಣಿಗಳನ್ನು ಕಚ್ಚುತ್ತದೆ. ಆದರೆ ಇತ್ತೀಚಿನ ದಿನಗಳಲ್ಲಿ ದನಕರುಗಳನ್ನು ಸಾಕುವುದು ಕಡಿಮೆಯಾಗಿದೆ. ಪ್ರಾಣಿಗಳ ಸಿಗದಿದ್ದಾಗ ಮನುಷ್ಯನ್ನು ಕಚ್ಚುತ್ತವೆ ಎಂದು ತಿಳಿಸಿದರು.
ಗ್ರಾಮಗಳಲ್ಲಿ ದನಕರುಗಳಿಗೆ ನೀರು ಕುಡಿಸಲು ನಿರ್ಮಿಲಾಸ ಸಿಮೆಂಟ್ ತೊಟ್ಟಿಗಳನ್ನು ಕಾಲಕಾಲಕ್ಕೆ ಸ್ವಚ್ಛಗೊಳಿಸಲು ಗ್ರಾ.ಪಂ. ಪಿಡಿಓಗಳಿಗೆ ಮನವಿ ಮಾಡಿಕೊಳ್ಳಲಾಗಿದೆ. ಜಿಲ್ಲೆಯ 43 ಕೆರೆ ಹಾಗೂ 15 ಚಿಕ್ಕ ಹೊಂಡಗಳಲ್ಲಿ ಲಾರ್ವಾಹಾನಿ ಮೀನುಗಳನ್ನು ಬಿಡಲಾಗಿದೆ . ಸಾಂಕ್ರಾಮಿಕ ರೋಗವಾಹಕಗಳ ಹತೋಟಿಗೆ ಹಾಗೂ ಮಲೇರಿಯಾ ಮುಕ್ತ ಮಾಡಲು ನಾವು ನೀವೆಲ್ಲ ಶ್ರಮಿಸೋಣ ಎಂದು ಹೇಳಿದರು .ಮಾಧ್ಯಮಗೋಷ್ಠಿಯಲ್ಲಿ ತಾಲೂಕಾ ಆರೋಗ್ಯಾಧಿಕಾರಿ ಡಾ.ಪ್ರಭಾಕರ ಕುಂದೂರ, ಜಿಲ್ಲಾ ಸರ್ವೇಕ್ಷಣಾಧಿಕಾರಿ ಜಗದೀಶ ಪಾಟೀಲ ಉಪಸ್ಥಿತರಿದ್ದರು.
ಪ್ರಜಾಪ್ರಗತಿಯಿಂದ ತಾಜಾ ಸುದ್ದಿಗಾಗಿ ಪ್ರಜಾಪ್ರಗತಿ facebook pageಲೈಕ್ ಮಾಡಿ
