ಬ್ಯಾಡಗಿ:
ನಿನ್ನೆಯಷ್ಟೇ ಬೈಕ್ ಅಪಘಾತದಲ್ಲಿ ಯುವಕನೊಬ್ಬ ಪ್ರಾಣ ಕಳೆದುಕೊಂಡ ಪ್ರಕರಣಕ್ಕೆ ಸಂಬಂಧಿಸಿದಂತೆ ಗುರುವಾರ ಲೋಕೋಪಯೋಗಿ, ಹಾಗೂ ರಕ್ಷಣಾ ಇಲಾಖೆ ಮತ್ತು ಪುರಸಭೆ ಸದಸ್ಯರ ತಂಡವು ಸ್ಥಳ ಪರಿಶೀಲನೆ ನಡೆಸಿತು.
ಈ ಸಂದರ್ಭದಲ್ಲಿ ಮಾತನಾಡಿದ ಪಿಎಸ್‍ಐ ಮಹಾಂತೇಶ್ ರಸ್ತೆಗಳಲ್ಲಿ ಸುಗಮ ಸಂಚಾರಕ್ಕೆ ಅನುಕೂಕಲ ಕಲ್ಪಿಸದೇ ಎಷ್ಟೇ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಂಡರೂ ಸಹ ಅಪಘಾತಗಳನ್ನು ನಿಯಂತ್ರಿಸಲು ಸಾಧ್ಯವಿಲ್ಲ, ಇದರಲ್ಲಿ ಗುಣಮಟ್ಟದ ಸೇರಿದಂತೆ ಸಾಧ್ಯವಾದಷ್ಟು ನೇರವಾದ ಸಂಚಾರ ಕಲ್ಪಿಸುವುದು ಸೇರಿದಂತೆ ವೇಗದ ಮಿತಿಯನ್ನು ನಿಯಂತ್ರಿಸುವುದಾಗಿದೆ, ನಿನ್ನೆಯ ಅಪಘಾತ ಒಂದು ರೀತಿಯಲ್ಲಿ ಆಶ್ಚರ್ಯ ಹಾಗೂ ಭಯವನ್ನುಂಟು ಮಾಡಿದೆ, ಅಪಾಯಕಾರಿ ತಿರುವುಗಳ ಬಗ್ಗೆ ಸಿಪಿಐ ನೇತೃತ್ವದ ತಂಡವು ಈಗಾಗಲೇ ಲೋಕೋಪಯೋಗಿ ಇಲಾಖೆಗೆ ಮಾಹಿತಿಯನ್ನು ಸಲ್ಲಿಸಿದೆ ಎಂದರು.
ಅಪಘಾತಕ್ಕೆ ವಾಹನ ಸವಾರರಷ್ಟೇ ಹೊಣೆಗಾರರಲ್ಲ: ಪುರಸಭೆ ಸದಸ್ಯೆ ಫಕ್ಕೀರಮ್ಮ ಛಲವಾದಿ ಮಾತನಾಡಿ, ಸದರಿ ಸ್ಥಳದಲ್ಲಿ ಈಗಾಗಲೇ ಸಾಕಷ್ಟು ಅಪಘಾತ ಗಳು ನಡೆದಿದ್ದು ಸಾಕಷ್ಟು ಸಾವು ನೋವುಗಳಾಗಿವೆ ಪ್ರತಿ ಸಂದರ್ಭದಲ್ಲಿಯೂ ಅವರ ಹಣೆ ಬರಹವನ್ನು ಬೈದುಕೊಂಡು ಹೋಗುತ್ತಿರುವುದು ಎಷ್ಟರಮಟ್ಟಿಗೆ ಸರಿ..? ನಿನ್ನೆ ನಡೆದ ಅಪಘಾತದಲ್ಲಿ ಯುವಕ ಮೃತನಾಗಿದ್ದು ರಸ್ತೆ ನೇರವಾಗಿ ಇಲ್ಲಿದಿರುವುದು ಪ್ರಮುಖ ಅಂಶವಾಗಿದೆ, ಇದೀಗ ಇರುವ ಒಬ್ಬನೇ ಮಗನನ್ನು ಕಳೆದುಕೊಂಡ ಕುಟುಂಬ ದುಖಃದ ಮಡುವಿನಲ್ಲಿ ಮುಳುಗಿದ್ದು ಇದಕ್ಕೆ ಲೋಕೋಪಯೋಗಿ ಇಲಾಖೆ ನಿರ್ಲಕ್ಷ್ಯವೇ ಇದಕ್ಕೆ ಕಾರಣವಾಗಿದೆ ಎಂದರು.
ಬೇಡವಾದಲ್ಲಿ ವೇಗ ನಿಯಂತ್ರಗಳಿವೆ (ಹಂಪ್ಸ್) ಇಲ್ಲೇಕಿಲ್ಲ..?: ಮುಖಂಡ ಸುರೇಶ ಅಸಾದಿ ಮಾತನಾಡಿ, ತಾಲೂಕಿನ ಬಹುತೇಕ ಕಡೆಗಳಲ್ಲಿ ಅವಶ್ಯವಿಲ್ಲದಿದ್ದರೂ ಸಹ ಕೆಲವಡೆಗಳಲ್ಲಿ 8 ರಿಂದ 10 ವೇಗ ನಿಯಂತ್ರಕ (ಹಂಪ್ಸ್) ಗಳನ್ನು ಅಳವಡಿಸಲಾಗಿದೆ, ಈಗಾಗಲೇ ಸಾಕಷ್ಟು ಸಾವು ನೋವು ಕಂಡಂತಹ ಸದರಿ ತಿರುವಿನಲ್ಲಿ ವೇಗ ನಿಯಂತ್ರಕಗಳೇಕಿಲ್ಲ, ನಿನ್ನೆ ನಡೆದ ಘಟನೆಗೆ ಪರೋಕ್ಷವಾಗಿ ಲೋಕೋಪಯೋಗಿ ಇಲಾಖೆಯೇ ಹೊಣೆ ಎಂದು ಆರೋಪಿಸಿದರು.
ಕಡತವನ್ನು ಸರ್ಕಾರಕ್ಕೆ ಸಲ್ಲಿಸಲಾಗಿದೆ: ಲೋಕೋಪಯೋಗಿ ಸಹಾಯಕ ಅಭಿಯಂತರ ರಾಜಪ್ಪ ಮಾತನಾಡಿ, ಅಪಘಾತ ಪ್ರಕರಣ ವಿಷಾದಕರ ಸಂಗತಿ, ನಿನ್ನೆ (ಜು.17) ಘಟನೆ ಸ್ಥಳವೂ ಸೇರಿದಂತೆ, ತಾಲೂಕಿನಲ್ಲಿ ಅಪಘಾತಕ್ಕೆ ಅಹ್ವಾನಿಸುತ್ತಿರುವ ಇಂತಹ ಒಟ್ಟು 20 ಕ್ಕೂ ಹೆಚ್ಚು ತಿರುವುಗಳನ್ನು ನೇರಗೊಳಿಸುವ ಕುರಿತು ಅಂದಾಜು ವೆಚ್ಚದೊಂದಿಗೆ ಕಡತವನ್ನು ಅನುಮೋದನೆಗಾಗಿ ಸರ್ಕಾರಕ್ಕೆ ಸಲ್ಲಿಸಿರುವುದಾಗಿ ತಿಳಿಸಿದರು. ತಾತ್ಕಾಲಿಕವಾಗಿ ಕೆರೆಯ ಒಡ್ಡನ್ನು ನೆಲಸಮಗೊಳಿಸುವ ಮೂಲಕ ಎದುರಿನಿಂದ ಬರುವಂತಹ ವಾಹನಗಳನ್ನು ಕಾಣುವಂತೆ ಮಾಡಲಾಗುವುದು ಎಂದರು. ಈ ಸಂದರ್ಭದಲ್ಲಿ ಪೊಲೀಸ್ ಸಿಬ್ಬಂದಿಗಳಾದ ಮಂಜುನಾಥ, ಹನುಮಂತ ಸುಂಕದ ಹಾಗೂ ಇನ್ನಿತರರು ಉಪಸ್ಥಿತರಿದ್ದರು.
ಪ್ರಜಾಪ್ರಗತಿಯಿಂದ ತಾಜಾ ಸುದ್ದಿಗಾಗಿ ಪ್ರಜಾಪ್ರಗತಿ facebook pageಲೈಕ್ ಮಾಡಿ
