ಅಜರ್ಬೈಜಾನ್:
ಯುವ ಚದುರಂಗ ಪ್ರತಿಭೆ ಆರ್. ಪ್ರಜ್ಞಾನಂದ ಅಮೋಘ ನಿರ್ವಹಣೆಯ ನಡುವೆ ಫಿಡೆ ಚೆಸ್ ವಿಶ್ವಕಪ್ನಲ್ಲಿ ರನ್ನರ್ಅಪ್ ಸ್ಥಾನಕ್ಕೆ ತೃಪ್ತಿಪಟ್ಟರು. ವಿಶ್ವ ನಂ. 1 ಮ್ಯಾಗ್ನಸ್ ಕಾರ್ಲ್ಸೆನ್ ವಿರುದ್ಧದ ಪ್ರಶಸ್ತಿ ಸುತ್ತಿನ ಹೋರಾಟದ ಟೈ ಬ್ರೇಕರ್ನಲ್ಲಿ ಎಡವಿದ ಪ್ರಜ್ಞಾನಂದ 0.5-1.5ರಿಂದ ಮಣಿದರು.
ಇದರ ನಡುವೆಯೂ ಟೂರ್ನಿಯಲ್ಲಿ ತೋರಿದ ಅದ್ಭುತ ಆಟದಿಂದಾಗಿ 18 ವರ್ಷದ ತರುಣ ಪ್ರಜ್ಞಾನಂದ ಕ್ರೀಡಾಪ್ರೇಮಿಗಳ ಹೃದಯ ಗೆಲ್ಲುವಲ್ಲಿ ಯಶಸ್ವಿಯಾದರು. ಇದರ ಬೆನ್ನಲ್ಲೇ ಪ್ರಧಾನಿ ನರೇಂದ್ರ ಮೋದಿ ಸಹಿತ ಗಣ್ಯರು ಪ್ರಜ್ಞಾನಂದ ಅವರನ್ನು ಹೊಗಳಿದ್ದಾರೆ.
‘ಫಿಡೆ ವಿಶ್ವಕಪ್ನಲ್ಲಿ ತೋರಿದ ಅಮೋ ನಿರ್ವಹಣೆಗಾಗಿ ಪ್ರಜ್ಞಾನಂದ ಬಗ್ಗೆ ನಮಗೆ ಹೆಮ್ಮೆ ಇದೆ. ಅಪೂರ್ವವಾದ ಕೌಶಲ ಪ್ರದರ್ಶಿಸಿದ್ದಲ್ಲದೆ, ಫೈನಲ್ನಲ್ಲಿ ಮ್ಯಾಗ್ನಸ್ ಕಾರ್ಲ್ಸೆನ್ಗೆ ಕಠಿಣ ಸ್ಪರ್ಧೆಯೊಡ್ಡಿದರು. ಇದೇನು ಸಣ್ಣ ಸಾಧನೆಯಲ್ಲ. ಮುಂಬರುವ ಟೂರ್ನಿಗಳಿಗೆ ಶುಭವಾಗಲಿ’ ಎಂದು ಪ್ರಧಾನಿ ನರೇಂದ್ರ ಮೋದಿ ಟ್ವಿಟರ್ನಲ್ಲಿ ಶ್ಲಾಘಿಸಿದ್ದಾರೆ.
‘ಅದ್ಭುತವಾದ ಟೂರ್ನಿಗಾಗಿ ಪ್ರಜ್ಞಾನಂದಗೆ ಅಭಿನಂದನೆಗಳು. ನಿನ್ನ ಕನಸುಗಳನ್ನು ಹಿಂಬಾಲಿಸುವುದನ್ನು ಮತ್ತು ಭಾರತಕ್ಕೆ ಹೆಮ್ಮೆ ತರುವುದನ್ನು ಮುಂದುವರಿಸು’ ಎಂದು ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡುಲ್ಕರ್ ಹೊಗಳಿದ್ದಾರೆ. ‘ಪ್ರಜ್ಞಾನಂದ, ನೀವು ಎಂದಿನಂತೆಯೇ ಈ ಸಲವೂ ನಮಗೆ ಹೆಮ್ಮೆ ತಂದಿದ್ದೀರಿ’ ಎಂದು ಕ್ರಿಕೆಟಿಗ ಆರ್. ಅಶ್ವಿನ್ ಮೆಚ್ಚಿದ್ದಾರೆ.
ಪ್ರಜಾಪ್ರಗತಿಯಿಂದ ತಾಜಾ ಸುದ್ದಿಗಾಗಿ ಪ್ರಜಾಪ್ರಗತಿ facebook page ಲೈಕ್ ಮಾಡಿ
