ಬೆಂಗಳೂರು:
ಈ ಬಾರಿಯ ಬೇಸಿಗೆಯಲ್ಲಿ ರಾಜಧಾನಿ ಬೆಂಗಳೂರಿನ ಹಲವು ಪ್ರದೇಶಗಳ ಜನರು ನೀರಿನ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಇಂತಹ ಪರಿಸ್ಥಿತಿಯಲ್ಲಿ ‘ಆಕ್ಟಿವ್ ಬೆಂಗಳೂರು’ ಎಂಬ ಲಾಭರಹಿತ ಸಂಸ್ಥೆ ನಗರದ ಹಲವು ಕೊಳಚೆ ಪ್ರದೇಶಗಳ ನಿವಾಸಿಗಳಿಗೆ ನೀರು ಪೂರೈಸಿ ಸಹಾಯ ಮಾಡುತ್ತಿದೆ. ಈ ಕಠಿಣ ಬೇಸಿಗೆಯಲ್ಲಿ ನೀರಿನ ಸಮಸ್ಯೆಯನ್ನು ಎದುರಿಸಲು ಸಂಸ್ಥೆಯು ನಿವಾಸಿಗಳಿಗೆ ನೀರನ್ನು ಪೂರೈಸುತ್ತಿದೆ.
ಬೆಂಗಳೂರಿನ ಥಣಿಸಂದ್ರ, ಹೆಗಡೆ ನಗರ, ಸಾರಾಯಿಪಾಳ್ಯ ಸೇರಿದಂತೆ ಉತ್ತರ ಬೆಂಗಳೂರಿನ ಕೊಳೆಗೇರಿಗಳ ನಿವಾಸಿಗಳ ಮನೆ ಬಾಗಿಲಿಗೆ ‘ಆಕ್ಟಿವ್ ಬೆಂಗಳೂರು’ ಸಂಸ್ಥೆ ಪ್ರತಿ ದಿನವೂ 50,000 ಲೀಟರ್ ನೀರು ಪೂರೈಸುತ್ತಿದೆ.
ನಗರದ ಇತರ ಭಾಗಗಳಂತೆ, ಈ ಪ್ರದೇಶಗಳಲ್ಲಿಯೂ ಈ ವರ್ಷ ಸುಮಾರು ಆರು ಸಾವಿರ ಸಾರ್ವಜನಿಕ ಬೋರ್‌ವೆಲ್‌ಗಳು ಬತ್ತಿ ಹೋಗಿವೆ. ‘ಆಕ್ಟಿವ್ ಬೆಂಗಳೂರು’ ಸಂಸ್ಥೆಯ ಸದಸ್ಯರು ಮಿನಿ-ಟೆಂಪೋಗಳಲ್ಲಿ ಅಳವಡಿಸಲಾದ ನಾಲ್ಕು ನೀರಿನ ಟ್ಯಾಂಕ್‌ಗಳಲ್ಲಿ (ತಲಾ 2,500-ಲೀಟರ್ ಸಾಮರ್ಥ್ಯ) ನೀರನ್ನು ಪೂರೈಸುತ್ತಾರೆ.
ಈ ಬಗ್ಗೆ ದಿ ನ್ಯೂ ಇಂಡಿಯನ್ ಎಕ್ಸ್‌ಪ್ರೆಸ್‌ನೊಂದಿಗೆ ಮಾತನಾಡಿದ ‘ಆಕ್ಟಿವ್ ಬೆಂಗಳೂರು’ ಸ್ವಯಂಸೇವಕ ತೌಸೀಫ್ ಅಹ್ಮದ್, “ಪ್ರಾಜೆಕ್ಟ್ ಝಮ್ ಝಮ್’ ಅಡಿಯಲ್ಲಿ ಉತ್ತರ ಬೆಂಗಳೂರಿನ ಕೊಳೆಗೇರಿ ಜನತೆಗೆ ಉಚಿತವಾಗಿ ನೀರು ಸರಬರಾಜು ಮಾಡಲಾಗುತ್ತಿದೆ. ಮಾರ್ಚ್‌ನಲ್ಲಿ ಯೋಜನೆ ಆರಂಭವಾಗಿದ್ದು, ಇಲ್ಲಿಯವರೆಗೆ 12 ಲಕ್ಷ ಲೀಟರ್‌ಗೂ ಹೆಚ್ಚು ಬೋರ್‌ವೆಲ್‌ ನೀರು ಪೂರೈಸಿದ್ದೇವೆ. ಈ ಕೊಳೆಗೇರಿಗಳ ನಿವಾಸಿಗಳು ಸೋಂಕಿನಿಂದ ಬಳಲುತ್ತಿದ್ದಾರೆ. ನೀರಿನ ಕೊರತೆಯು ನಿವಾಸಿಗಳಲ್ಲಿ ನಿರ್ಜಲೀಕರಣಕ್ಕೆ ಕಾರಣವಾಗಬಹುದು. ಆದ್ದರಿಂದ, ನಾವು ಈ ಉಪಕ್ರಮವನ್ನು ಕೈಗೆತ್ತಿಕೊಂಡಿದ್ದೇವೆ ಎಂದರು.
ಜನೋಪಕಾರಿಗಳಿಗೆ ನೀರನ್ನು ಪೂರೈಸಲು ಬೋರ್ ವೆಲ್ ಗಳಿಂದ ನೀರನ್ನು ಸಂಗ್ರಹಿಸಿ ಅದನ್ನು ಕೊಳೆಗೇರಿಗಳಿಗೆ ಸರಬರಾಜು ಮಾಡಲಾಗುತ್ತದೆ. ನೀರಿನ ಅವಶ್ಯಕತೆಯಿದ್ದಾಗ ಎನ್‌ಜಿಒದ ತುರ್ತು ಸಂಖ್ಯೆಗೆ ಕರೆ ಮಾಡಲು ನಿವಾಸಿಗಳಿಗೆ ತಿಳಿಸಲಾಗಿದೆ. ಒಂದು ಪ್ರದೇಶದಿಂದ ಸ್ವೀಕರಿಸಿದ ಕರೆಗಳ ಸಂಖ್ಯೆಯನ್ನು ಆಧರಿಸಿ, ವಾಹನವನ್ನು ಕಳುಹಿಸಲಾಗುತ್ತದೆ. ಪ್ರತಿ ಟ್ಯಾಂಕ್‌ನಲ್ಲಿ, ಸುಮಾರು ನಾಲ್ಕು ನಲ್ಲಿಗಳನ್ನು ಸರಿಪಡಿಸಲಾಗಿದೆ ಮತ್ತು ನಿವಾಸಿಗಳು ಸರದಿಯಲ್ಲಿ ಬಂದು ನೀರು ಸಂಗ್ರಹಿಸುವಂತೆ ಸೂಚಿಸಲಾಗುತ್ತದೆ ಎಂದು ‘ಆಕ್ಟಿವ್ ಬೆಂಗಳೂರು’ ನ ಇನ್ನೊಬ್ಬ ಸದಸ್ಯರು ಹೇಳಿದರು.
ಎನ್ ಜಿಒ ಹೆಚ್ಚಾಗಿ ನೀತಿ ಸಮಸ್ಯೆಗಳು, ಮಹಿಳಾ ಸಬಲೀಕರಣ, ಆರೋಗ್ಯ ಮತ್ತು ಶಿಕ್ಷಣ ಕ್ಷೇತ್ರದಲ್ಲಿ ಕೆಲಸ ಮಾಡುತ್ತದೆ. ನೀರಿನ ಕೊರತೆಯು ಮಕ್ಕಳ ಆರೋಗ್ಯ ಮತ್ತು ಶಿಕ್ಷಣದ ಮೇಲೆ ನೇರವಾಗಿ ಪರಿಣಾಮ ಬೀರುತ್ತದೆ. ನಾವು ಅದನ್ನು ಪರಿಹರಿಸಲು ನಮ್ಮ ಕೈಲಾದಷ್ಟು ಪ್ರಯತ್ನ ಮಾಡುತ್ತೇವೆ. ಅಗತ್ಯವಿರುವವರಿಗೆ ನೀರು ಪೂರೈಸಲು ಕೈಜೋಡಿಸಿದ್ದೇವೆ ಎಂದು ಸಂಸ್ಥೆಯ ಇನ್ನೊಬ್ಬ ಸದಸ್ಯ ಹೇಳಿದರು.
