ಗುರುಗ್ರಾಮ:
10ನೇ ಅಂತಾರಾಷ್ಟ್ರೀಯ ಗೀತಾ ಉತ್ಸವವು ಶನಿವಾರ ಕುರುಕ್ಷೇತ್ರದಲ್ಲಿ ಪ್ರಾರಂಭವಾಗಲಿದ್ದು, ಡಿಸೆಂಬರ್ 5 ರವರೆಗೆ ನಡೆಯಲಿದೆ ಎಂದು ಹರಿಯಾಣ ಮುಖ್ಯಮಂತ್ರಿ ನಯಾಬ್ ಸಿಂಗ್ ಸೈನಿ ಶುಕ್ರವಾರ ಘೋಷಿಸಿದರು. ನವೆಂಬರ್ 25 ರಂದು ನಡೆಯಲಿರುವ ಗೀತಾ ಮಹೋತ್ಸವದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಭಾಗವಹಿಸಲಿದ್ದಾರೆ ಎಂದು ಅವರು ಹೇಳಿದರು.
ಗೀತಾ ಮನಿಷಿ ಸ್ವಾಮಿ ಜ್ಞಾನಾನಂದ ಮಹಾರಾಜ್, ಬಿಜೆಪಿ ರಾಜ್ಯಾಧ್ಯಕ್ಷ ಮೋಹನ್ ಲಾಲ್ ಬಡೋಲಿ ಮತ್ತು ಕುರುಕ್ಷೇತ್ರ ಸಂಸದ ನವೀನ್ ಜಿಂದಾಲ್ ಅವರೊಂದಿಗೆ ಸುದ್ದಿಗಾರರೊಂದಿಗೆ ಮಾತನಾಡಿದ ಮುಖ್ಯಮಂತ್ರಿ, ಮಾರಿಷಸ್, ಬ್ರಿಟನ್, ಕೆನಡಾ, ಆಸ್ಟ್ರೇಲಿಯಾ, ಶ್ರೀಲಂಕಾ ಮತ್ತು ಜಪಾನ್ನಂತಹ ದೇಶಗಳಲ್ಲಿಯೂ ಗೀತಾ ಮಹೋತ್ಸವ ಆಚರಣೆಗಳನ್ನು ನಡೆಸಲಾಗಿದೆ ಎಂದು ಹೇಳಿದರು.
2016 ರಿಂದ, ಅಂತಾರಾಷ್ಟ್ರೀಯ ಗೀತಾ ಮಹೋತ್ಸವವು ಪ್ರತಿವರ್ಷವೂ ಬೆಳೆಯುತ್ತಿದೆ. ಭಾರತ ಮತ್ತು ವಿದೇಶಗಳಿಂದ ಹೆಚ್ಚಿನ ಭಕ್ತರು ಹಾಜರಾಗುತ್ತಿದ್ದು, ಅದಕ್ಕೆ ಅನುಗುಣವಾಗಿ ವ್ಯವಸ್ಥೆಗಳು ವಿಸ್ತರಿಸುತ್ತಿವೆ ಎಂದು ಸೈನಿ ಹೇಳಿದರು. ವೇದಗಳು, ಉಪನಿಷತ್ತುಗಳು ಮತ್ತು ಪುರಾಣಗಳನ್ನು ಸರಸ್ವತಿ ನದಿಯ ಪವಿತ್ರ ದಡದಲ್ಲಿ ರಚಿಸಲಾಗಿದೆ. ಈ ಭೂಮಿ ಶ್ರೀಮದ್ ಭಗವದ್ಗೀತೆಯ ಜನ್ಮಸ್ಥಳವಾಗಿ ಎಂದು ಅವರು ಇದೇ ವೇಳೆ ಹೇಳಿದರು. ಭಗವದ್ಗೀತೆಯಲ್ಲಿ ಶ್ರೀಕೃಷ್ಣನು ನೀಡಿದ ಶಾಶ್ವತ ಜ್ಞಾನವು ಈ ವರ್ಷಕ್ಕೆ 5,163 ವರ್ಷಗಳನ್ನು ಪೂರೈಸುತ್ತದೆ ಎಂದು ಸೈನಿ ಹೇಳಿದರು.
ದೆಹಲಿ ಸ್ಫೋಟದ ನಂತರ ಹರಿಯಾಣದಲ್ಲಿ ಕಟ್ಟೆಚ್ಚರ ವಹಿಸಲಾಗಿದ್ದು, ಗೀತಾ ಉತ್ಸವಕ್ಕೆ ಭದ್ರತೆ ಹೆಚ್ಚಿಸಲಾಗಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ. ನವೆಂಬರ್ 24 ರಿಂದ ಕುರುಕ್ಷೇತ್ರ ವಿಶ್ವವಿದ್ಯಾಲಯದಲ್ಲಿ ಮೂರು ದಿನಗಳ ಅಂತಾರಾಷ್ಟ್ರೀಯ ಗೀತಾ ವಿಚಾರ ಸಂಕಿರಣ ಪ್ರಾರಂಭವಾಗಲಿದ್ದು, ಅಲ್ಲಿ ಭಾರತ ಮತ್ತು ವಿದೇಶಗಳ ಗೀತಾ ವಿದ್ವಾಂಸರು ಮತ್ತು ಸಂಶೋಧಕರು ತಮ್ಮ ಸಂಶೋಧನಾ ಪ್ರಬಂಧಗಳನ್ನು ಆನ್ಲೈನ್ನಲ್ಲಿ ಮಂಡಿಸಲಿದ್ದಾರೆ ಎಂದು ಸೈನಿ ಹೇಳಿದರು. ಈ ವರ್ಷ, 16 ದೇಶಗಳ 25 ವಿದ್ವಾಂಸರು ಈ ವಿಚಾರ ಸಂಕಿರಣದಲ್ಲಿ ಭಾಗವಹಿಸಲಿದ್ದಾರೆ ಮತ್ತು 51 ದೇಶಗಳಲ್ಲಿ ಗೀತಾ ಮಹೋತ್ಸವ ಕಾರ್ಯಕ್ರಮಗಳು ನಡೆಯಲಿವೆ.
ಫಿಜಿ ಮತ್ತು ಟ್ರಿನಿಡಾಡ್ ಮತ್ತು ಟೊಬಾಗೋದಿಂದ ಇಪ್ಪತ್ತು ಪುರೋಹಿತರು ವಿವಿಧ ಕಾರ್ಯಕ್ರಮಗಳಲ್ಲಿ ಭಾಗವಹಿಸಲು ಎರಡು ದಿನಗಳ ಕಾಲ ಕುರುಕ್ಷೇತ್ರಕ್ಕೆ ಭೇಟಿ ನೀಡಲಿದ್ದಾರೆ ಮತ್ತು ಏಳು ದೇಶಗಳ 25 ಕುಶಲಕರ್ಮಿಗಳು ಉತ್ಸವದ ಸಮಯದಲ್ಲಿ ತಮ್ಮ ಕರಕುಶಲ ವಸ್ತುಗಳನ್ನು ಪ್ರದರ್ಶಿಸಲಿದ್ದಾರೆ.
ಡಿಸೆಂಬರ್ 1 ರಂದು ಕುರುಕ್ಷೇತ್ರದ ಎಲ್ಲಾ 182 ಯಾತ್ರಾ ಸ್ಥಳಗಳಲ್ಲಿ ದೀಪೋತ್ಸವ ಆಚರಣೆಗಳು ನಡೆಯಲಿದ್ದು, ವಿವಿಧ ಧಾರ್ಮಿಕ ಮತ್ತು ಸಾಮಾಜಿಕ ಗುಂಪುಗಳ ಭಾಗವಹಿಸುವಿಕೆಯೊಂದಿಗೆ ಗೀತಾ ಶೋಭಾಯಾತ್ರೆಯನ್ನು ಆಯೋಜಿಸಲಾಗುವುದು ಎಂದು ಸೈನಿ ಹೇಳಿದರು. ನವೆಂಬರ್ 24 ರಿಂದ ಡಿಸೆಂಬರ್ 1ರ ವರೆಗೆ, ಗೀತಾ, ಮಹಾಭಾರತ ಮತ್ತು ಶ್ರೀಕೃಷ್ಣನ ವಿಷಯಗಳನ್ನು ಆಧರಿಸಿ ಪುರುಷೋತ್ತಮಪುರ ಬಾಗ್ನಲ್ಲಿ ಪ್ರತಿದಿನ ಸಂಜೆ ಭವ್ಯ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆಯಲಿವೆ.
ನವೆಂಬರ್ 28 ರಿಂದ 30ರ ವರೆಗೆ, ಸನ್ನಿಹಿತ್ ಸರೋವರ ಮತ್ತು ಬ್ರಹ್ಮ ಸರೋವರದಲ್ಲಿ ಗೀತಾ ಶ್ಲೋಕ ಪಠಣ, ಭಾಷಣಗಳು, ಪ್ರಬಂಧ ಬರವಣಿಗೆ, ಚಿತ್ರಕಲೆ, ರಂಗೋಲಿ ಮತ್ತು ಕರಕುಶಲ ವಸ್ತುಗಳಂತಹ ಸ್ಪರ್ಧೆಗಳು ನಡೆಯಲಿವೆ. ನವೆಂಬರ್ 24 ರಿಂದ ಡಿಸೆಂಬರ್ 1 ರವರೆಗೆ ಬ್ರಹ್ಮ ಸರೋವರದಲ್ಲಿ ಗೀತಾ ಪುಸ್ತಕ ಮೇಳ ನಡೆಯಲಿದೆ. ಇದರಲ್ಲಿ ದೇಶಾದ್ಯಂತದ ಪ್ರಮುಖ ಪ್ರಕಾಶಕರು ಭಾಗವಹಿಸಲಿದ್ದಾರೆ.
