ಮೈಸೂರು
ರಂಜಾನ್ ಸಂದರ್ಭದಲ್ಲಿ ಉಪವಾಸದ ಪರಿಣಾಮ, ದೇಹ ರಚನೆ, ಕೊಬ್ಬಿನ ಪ್ರಮಾಣ ಮತ್ತಿತರ ವಿಷಯಗಳ ಬಗ್ಗೆ ಅಧ್ಯಯನ ನಡೆಸಲು ಮೈಸೂರು ವಿಶ್ವವಿದ್ಯಾಲಯದ ಆಹಾರ ವಿಜ್ಞಾನ ಮತ್ತು ಪೌಷ್ಟಿಕಾಂಶ ವಿಭಾಗ ಮುಂದಾಗಿದೆ.
ಮಧುಮೇಹ ಖಾಯಿಲೆ ಇಲ್ಲದ 18ರಿಂದ 65 ವರ್ಷದೊಳಗಿನ ವ್ಯಕ್ತಿಗಳು ರಂಜಾನ್ ಉಪವಾಸ ಆಚರಿಸುವ ಮೊದಲು ಮತ್ತು ನಂತರ ಅವರ ರಕ್ತದ ಮಾದರಿಗಳನ್ನು ಪಡೆದು ಅಧ್ಯಯನ ನಡೆಸಲು ಎಲ್ಲಾ ವ್ಯವಸ್ಥೆಗಳನ್ನು ಮಾಡಲಾಗಿದೆ ಎಂದು ವಿಭಾಗದ ಅಧ್ಯಕ್ಷರಾದ ಅಸ್ನು ಉರೂಜ್ ತಿಳಿಸಿದ್ದಾರೆ.
ಉಪವಾಸ ಆರಂಭಕ್ಕೂ ಮೊದಲು ಉಪವಾಸಿಗನಿಂದ ರಕ್ತ ಪಡೆಯಲಾಗುತ್ತದೆ ಮತ್ತು ಒಂದು ತಿಂಗಳ ಉಪವಾಸ ಮುಗಿದ ನಂತರವೂ ಅದೇ ವ್ಯಕ್ತಿಯಿಂದ ರಕ್ತ ಪಡೆದು ಅವುಗಳಲ್ಲಿ ಕೊಬ್ಬು, ರಕ್ತದ ಗ್ಲುಕೋಸ್, ಉತ್ಕರ್ಷಣ ನಿರೋಧಕಗಳು, ಪಿತ್ತಜನಕಾಂಗ ಮತ್ತು ಮೂತ್ರಪಿಂಡಗಳ ಕಾರ್ಯಚಟುವಟಿಕೆಗಳಿಗೆ ಸಂಬಂಧಿಸಿದ ಬದಲಾವಣೆಗಳ ಬಗ್ಗೆ ಅಧ್ಯಯನ ನಡೆಸಲಾಗುವುದು ಎಂದು ಅವರು ತಿಳಿಸಿದ್ದಾರೆ.
ಮುಸ್ಲಿಮರು ರಂಜಾನ್ ತಿಂಗಳಲ್ಲಿ ಪ್ರತಿದಿನ ಸುಮಾರು ಹದಿಮೂರುವರೆ ಗಂಟೆಗಳ ಕಾಲ ಅಂದರೆ ಬೆಳಗ್ಗಿನ ಜಾವ 5 ಗಂಟೆಯಿಂದ ಸಂಜೆ 6.30ರವರೆಗೆ ನೀರು ಸೇರಿದಂತೆ ಯಾವುದೇ ಆಹಾರ ಪಾನೀಯ ಸೇವಿಸದೆ ಉಪವಾಸ ಆಚರಿಸುತ್ತಾರೆ. ಶಹ್ರಿ ಎಂದು ಕರೆಯುವ ಬೆಳಗ್ಗಿನ ಜಾವ 4.50ರೊಳಗೆ ಊಟ ಮಾಡಿ ಸಂಜೆ 6.30ರಿಂದ 6.40ರ ಅವಧಿಯಲ್ಲಿ ಇಫ್ತಾರ್ ಮಾಡಿ ಉಪವಾಸ ಬಿಡುತ್ತಾರೆ. ಇದೇ ರೀತಿ 30 ದಿನಗಳಲ್ಲೂ ಉಪವಾಸ ಆಚರಿಸುತ್ತಾರೆ.
“ಚಯಾಪಚಯ ಮತ್ತು ದೇಹ ಸಂಯೋಜನೆಯ ಮೇಲೆ ಉಪವಾಸದ ಪರಿಣಾಮವನ್ನು ಅಧ್ಯಯನ ಮಾಡಲು ಇದು ಒಳ್ಳೆಯ ಅವಕಾಶ. ಈ ವಿಷಯದಲ್ಲಿ ಭಾರತದಲ್ಲಿ ಸೀಮಿತ ಅಧ್ಯಯನಗಳನ್ನು ಮಾತ್ರ ನಡೆಸಲಾಗಿದೆ. ಆದ್ದರಿಂದ, ನಾವು ಇದನ್ನು ಒಂದು ಉತ್ತಮ ಅಧ್ಯಯನವೆಂದು ಪರಿಗಣಿಸುತ್ತೇವೆ ” ಎಂದು ಅವರು ಹೇಳಿದ್ದಾರೆ.
ಅಂತಹ ಅಭ್ಯಾಸವು ವೈಜ್ಞಾನಿಕವಾಗಿ ಧಾರ್ಮಿಕ ಆಚರಣೆಗಳ ಮೌಲ್ಯೀಕರಣಕ್ಕೆ ಸಹಾಯವಾಗುತ್ತದೆ ಮತ್ತು ಅವರ ಆರೋಗ್ಯ ಪ್ರಯೋಜನಗಳ ಮೇಲೆ ಬೆಳಕು ಚೆಲ್ಲುತ್ತದೆ ಎಂದು ಅವರು ತಿಳಿಸಿದ್ದಾರೆ.ಮೇ 7ರಿಂದ ರಂಜಾನ್ ಉಪವಾಸ ಆರಂಭಗೊಳ್ಳುವ ಸಾಧ್ಯತೆ ಇದೆ. ಆದರೆ ಚಂದ್ರದರ್ಶನವಾದ ಬಳಿಕವೇ ರಂಜಾನ್ ಉಪವಾಸದ ಆರಂಭ ದಿನ ತಿಳಿಯಲಿದೆ.
ರಂಜಾನ್ ಪ್ರಾರಂಭವಾಗುವ ಮೊದಲು ರಕ್ತದ ಮಾದರಿಗಳನ್ನು ಅಧ್ಯಯನ ನಡೆಸಲು ಆಹಾರ ವಿಜ್ಞಾನ ಮತ್ತು ಪೌಷ್ಟಿಕಾಂಶ ವಿಭಾಗ ಎಲ್ಲಾ ಅಗತ್ಯ ಸಿದ್ಧತೆ ಮಾಡಿಕೊಂಡಿದೆ. ರಕ್ತದ ಮಾದರಿ ನೀಡುವ ಸ್ವಯಂ ಸೇವಕರು 30 ದಿನಗಳ ಉಪವಾಸ ಮುಗಿಸಿದ ಬಳಿಕವೂ ರಕ್ತದ ಮಾದರಿ ನೀಡುವಂತೆ ಕೋರಲಾಗಿದೆ ಎಂದು ಅವರು ತಿಳಿಸಿದರು.
ಪ್ರಜಾಪ್ರಗತಿಯಿಂದ ತಾಜಾ ಸುದ್ದಿಗಾಗಿ ಪ್ರಜಾಪ್ರಗತಿ facebook pageಲೈಕ್ ಮಾಡಿ
